नवरात्रीच्या याच निमित्ताने ठाणे येथील प्राइड पाम्स सोसायटीमध्ये तब्बल 50 महिलांनी एकत्र येऊन नऊवारी साड्या नेसून पारंपरिक भोंडला नृत्य सादर केलं. भोंडल्याचा या कार्यक्रम महिलांपेक्षा जास्त मुलींसाठी फार विशेष असतो. भोंडल्याचा हा खेळ सुरू करण्यापूर्वी मुली एका पाटावर हत्तीची रांगोळी काढून वा चित्र काढून त्याभोवती फेर धरतात. त्यानंतर ऐलमा पैलमा या गाण्याने पारंपारिक गाणी म्हणत फेर धरले जातात. कोकणात अशा पद्धतीने हा खेळ रंगला जातो.
advertisement
या सणासाठी घराच्या भिंतीवर सोंडेत माळ धरलेल्या आणि समोरासमोर तोंड केलेल्या दोन हत्तींचे रंगीत चित्र लावले जाते. घाटावर कुमारिका पाटावर डाळ तांदूळ किंवा धान्याने हत्ती काढतात. हत्ती हा समृद्धीचे प्रतीक मानला जातो त्यामुळे त्याची पूजा करुन घरात समृद्धी येते असा यामागील विश्वास आहे.
'ऐलमा पैलमा गणेश देवा'पासून गणेशाला वंदन करून मग एक एक करत चिडवणारी, टेर ओढणारी किंवा खिरापतीची मागणी करणारी गाणी गायली जातात आणि मग आड बाई आडोणी या गाण्याने या खेळने भोंडल्याची सांगता करतात.पूर्वीच्या काळी स्त्रियांना आपल्या रोजच्या कामातून विरंगुळा मिळावा म्हणून अशा प्रकारचे सण उत्सव साजरे केले जात होते. तर अलीकडे या परंपरेचा वारसा जपण्यासाठी अनेक ठिकाणी सार्वजनिक कार्यक्रमाचे आयोजन केले जाते.