विद्यार्थी दशेतून सुरू झालेली सामाजिक कल्पना
पियूष शाहा बीई कॉम्प्युटरच्या अंतिम वर्षात असताना, 2018मध्ये एका रुग्णासाठी रक्ताची गरज भासली होती. मात्र, रक्त मिळवण्यासाठी माहिती व प्रक्रिया यांची अडचण जाणवली. त्यातूनच 'ब्लड फॉर पुणे' या संकल्पनेचा जन्म झाला. या अ‍ॅप्लिकेशनच्या माध्यमातून रक्ताची गरज आणि रक्तदात्याची माहिती एकाच ठिकाणी उपलब्ध करून देण्यात आली आहे.
advertisement
गरजू आणि दाते यांना जोडणारी प्रणाली
या प्रणालीमध्ये रक्तदात्यांची सविस्तर माहिती नोंदवलेली असते. त्यामुळे रक्तदान करताना पुन्हा पुन्हा फॉर्म भरण्याची गरज भासत नाही. या अ‍ॅप्लीकेशनद्वारे रक्तदाता मिळण्यास मदत होते. त्यामुळे गरजूंना लगेच मदत मिळते.
अ‍ॅप आणि सोशल मीडियाची जोडणी
अनेक वेळा रक्ताची गरज निर्माण झाल्यावर लोकांना हे अ‍ॅप्लिकेशन माहित नसतं किंवा ते वेळेत डाउनलोड करता येत नाही. ही अडचण लक्षात घेऊन हे अ‍ॅप्लिकेशन थेट सोशल मीडियाशी जोडण्यात आलं आहे. जी व्यक्ती फॉर्म भरते त्याची माहिती 15 सेकंदात फेसबुक आणि एक्सवर (ट्विटर) पोहोचते. त्यामुळे रक्तदात्यांना त्वरीत मदत मिळते.
कोरोना काळात ठरली जीवनरक्षक
कोरोना काळात लॉकडाऊनमुळे रक्तसाठा कमी झाला होता. रक्तदान शिबिरे बंद होती आणि रुग्णांना वेळेवर रक्त मिळणं कठीण झालं होतं. अशा वेळी ब्लड फॉर पुणे या अ‍ॅपने मोठी मदत केली. घरबसल्या फॉर्म भरताच काही सेकंदात माहिती सोशल मीडियावर पोहोचायची आणि लगेच रक्तदाता मिळायचा. याच उपक्रमामुळे त्या काळात अनेक रुग्णांचे प्राण वाचले.
पुणे महानगरपालिका आणि पिंपरी-चिंचवड महानगरपालिका देखील ब्लड फॉर पुणे या अ‍ॅप्लिकेशन वापरत आहेत. महाराष्ट्र शासनाने देखील या उपक्रमाचा राज्यभर विस्तार करावा, अशी विनंती पियूष शहाने केली आहे.