51 किलोमीटरचा टप्पा पूर्ण
नागपूर (इतवारी) ते नागभीड हा एकूण 106 किलोमीटर लांबीचा रेल्वे प्रकल्प आहे, जो नॅरोगेज मार्गाचे ब्रॉडगेजमध्ये रूपांतरित करत आहे. या प्रकल्पाचे काम महाराष्ट्र रेल्वे पायाभूत सुविधा विकास महामंडळ (महारेल) मार्फत युद्धपातळीवर सुरू आहे. संबंधित अधिकाऱ्यांनी दिलेल्या माहितीनुसार, नागपूरपासून उमरेडपर्यंतच्या 51 किलोमीटर लांबीच्या ब्रॉडगेज लोहमार्गाचे काम पूर्ण झाले आहे. याच मार्गावर दिवाळीपूर्वी नवीन रेल्वे सेवा (Railway Service) सुरू करण्यात येणार आहे.
advertisement
कसा असेल रेल्वेमार्ग?
या महत्त्वाकांक्षी रेल्वे प्रकल्पाचा 100% खर्च केंद्र सरकार आणि राज्य सरकारमध्ये प्रत्येकी 50% विभागलेला आहे. 'महा रेल'कडून ही कामे अत्यंत वेगाने पूर्ण केली जात आहेत, ज्यामुळे हा प्रकल्प लवकरच प्रवाशांच्या सेवेत रुजू होईल अशी अपेक्षा आहे. हा रेल्वेमार्ग विदर्भातील भंडारा (Bhandara) आणि चंद्रपूर (Chandrapur) जिल्ह्यांना नागभीडमार्गे (Nagbhid) थेट नागपूरशी (Nagpur) जोडणार आहे. यामुळे या जिल्ह्यांच्या एकात्मिक विकासाला मोठी चालना मिळणार आहे. उमरेड, भिवापूर, पवनी कॉम्पा, मोहाळी आणि नागभीड ही या मार्गावरील महत्त्वाची स्थानके राहणार आहेत.
कोणाला होईल फायदा?
दरम्यान, आधुनिक ब्रॉडगेज मार्गामुळे दळणवळण व्यवस्था अत्यंत वेगवान होणार असून, प्रवाशांना सुरक्षित, आरामदायी आणि गतिमान प्रवासाचा अनुभव घेता येईल. या प्रकल्पाचा कृषी, उद्योग, शिक्षण आणि पर्यटन अशा सर्वच क्षेत्रांना फायदा होणार आहे. या रेल्वे कनेक्टिव्हिटीमुळे जवळपास 14 गावांमधील नागरिकांना नागपूरसारख्या महानगरासोबत थेट संपर्क साधता येणार आहे.