राजगुरुनगरमध्ये खासगी शिकवणी क्लासमध्ये खून, प्रशासन खडबडून जागे, मोठा निर्णय घेतला

राजगुरुनगर शहरात सोमवारी इयत्ता दहावीच्या एका विद्यार्थ्याची त्याच्या वर्गमित्रानेच खासगी शिकवणी क्लासमध्ये वार करून हत्या केली. या धक्कादायक घटनेने संपूर्ण परिसरात खळबळ उडाली. ज्यानंतर प्रशासन अॅक्टिव्ह झाले असून शहरातील १८ खासगी नोंदणीकृत शिकवणी क्लासेसची सखोल तपासणी करण्यात आली.

प्रशासन अॅक्टिव्ह मोडवर, खासगी शिकवण्यांची झाडाझडती

खासगी शिकवणी क्लासेसची सखोल तपासणी करण्यात येणार आहे . यासाठी चार स्वतंत्र पथकांची नेमणूक करून ही कारवाई राबविण्यात येणार आहे . तपासणीदरम्यान विद्यार्थ्यांच्या सुरक्षिततेशी थेट संबंधित बाबींवर विशेष भर देण्यात येणार आहे.

advertisement

यामध्ये अग्निशमन यंत्रणा व त्यांची अद्ययावत स्थिती, सीसीटीव्ही कॅमेरे व त्यांची कार्यक्षमता, स्वच्छतागृहे व पिण्याच्या पाण्याची उपलब्धता, शिक्षक व कर्मचाऱ्यांची चारित्र्य प्रमाणपत्रे, बायोमेट्रिक उपस्थिती व्यवस्था पाहण्यात येणार आहे, असे गटशिक्षणाधिकारी अमोल जंगले यांनी सांगितले.

मित्रानेच मित्राचा खून केला, क्लासमध्ये रक्तरंजित थरार

पुष्कर दिलीप शिंगाडे (वय १६) असे खून झालेल्या मुलाचे नाव आहे. खून प्रकरणी पुष्करच्या मित्राला ताब्यात घेण्यात आले आहे. पोलिसांनी दिलेल्या माहितीनुसार, पुष्कर हा राजगुरूनगरमधील एका शाळेत शिक्षण घेत आहे. तीन महिन्यांपूर्वी पुष्करचा वर्गात एका मित्राबरोबर किरकोळ वाद झाला होता. त्याच रागातून त्याच्या मित्राने पुष्करला संपविले.