संजय राऊत काय म्हणाले होते?
एकनाथ शिंदे हे बुधवारी रात्री अचानकपणे दिल्ली दौऱ्यावर गेले होते. त्यानंतर राजकीय चर्चांना उधाण आले होते. आज ठाकरे गटाचे नेते संजय राऊत यांनी शिंदे यांच्या दौऱ्यावर सडकून टीका केली होती. एकनाथ शिंदे यांनी भाजपला ऑफर दिली असून आपल्याला मुख्यमंत्री करा, अशी मागणी देखील केली असल्याचा दावा संजय राऊत यांनी केला. मुंबईत ईडीच्या हालचाली सुरू आहेत. त्यामुळे राज्याच्या राजकारणात उलथापालथ होईल असा दावा राऊत यांनी केला होता.
advertisement
तपास यंत्रणांनी फाईल उघडण्यास सुरूवात केली आहे. शिंदेंच्या लोकांवर आता कारवाई होण्याच्या शक्यता असल्याचे त्यांनी म्हटले. नुकतीच आयकर विभागाची नोटीस ज्या मंत्र्याला आली, त्याचा एक व्हिडीओ आपल्याकडे असल्याचा दावा संजय राऊत यांनी केला. या व्हिडीओत त्या मंत्र्‍याकडे पैशांनी भरलेली बॅग दिसत असल्याचा दावा संजय राऊतांनी केला.
व्हायरल होणाऱ्या व्हिडीओत काय?
व्हायरल होणार्‍या व्हिडीओत शिवसेना शिंदे गटाचे मंत्री संजय शिरसाट दिसत आहेत. संजय शिरसाट हे फोनवर बोलत असून बेडवर बसले आहेत. तर, त्यांच्या खोलीत एक मोठी बॅग आहे. या बॅगेत नोटांची बंडले दिसत आहेत.
आरोपांवर शिरसाट काय म्हणाले?
व्हिडीओ व्हायरल झाल्यानंतर मंत्री संजय शिरसाट यांनी त्यावर आपले स्पष्टीकरण दिले. संजय राऊत यांचे आरोप हास्यास्पद असल्याचे त्यांनी सांगितले. तो व्हिडीओ आपल्या घरातील असून माझा श्वान देखील दिसत असल्याचे सांगितले. मी दौऱ्यावरून आलो होतो, त्यात बॅगेत नोटा नसून कपडे असल्याचे शिरसाट यांनी सांगितले.
माझ्या घरात सामान्य कार्यकर्ते, जनतेला प्रवेश असतो. त्यातील एखादा कार्यकर्ता आला असेल आणि उत्सुकता म्हणून व्हिडीओ काढला असेल असेही त्यांनी म्हटले. त्या बॅगेत नोटा नसून आपले कपडे असल्याचा दावा शिरसाट यांनी केला. व्हिडीओ काढणाऱ्यावरही आपला आक्षेप नसल्याचे शिरसाट यांनी म्हटले.