पल्लवी प्रवीण सग्गम असे मृत महिलेचे नाव असून ही घटना गुरुवारी घडली. ज्यावेळी ही दुर्घटना घडली त्यावेळी मयत पल्लवी सग्गम घरात बसल्या होत्या. यावेळी अचानक त्यांच्या घरातील एसीचा स्फोट झाला. स्फोटानंतर काही काही कळायच्या आत घरात तत्काळ शॉर्टसर्किट झाले आणि आग वेगाने पसरली. आगीच्या ज्वाळा इतक्या भयंकर होत्या की, त्यांना घरातून बाहेर पडण्याची संधीच मिळाली नाही. आजूबाजूच्या रहिवाशांनी आग लागल्याचे पाहिल्यानंतर आरडाओरडा सुरू केला आणि तत्काळ अग्निशमन दलाला आणि पोलिसांना याची माहिती दिली.
advertisement
अग्निशमन दलाचे जवान घटनास्थळी दाखल झाले आणि त्यांनी आग विझवण्यासाठी शर्थीचे प्रयत्न केले. अथक प्रयत्नांनंतर आगीवर नियंत्रण मिळवण्यात यश आले, परंतु तोपर्यंत खूप उशीर झाला होता. घरात तपासणी केली असता, पल्लवी सग्गम यांचा मृतदेह पूर्णपणे होरपळलेल्या अवस्थेत आढळून आला.
या घटनेची माहिती मिळताच स्थानिक पोलिसांनी घटनास्थळी धाव घेतली. त्यांनी पंचनामा करून मृतदेह शवविच्छेदनासाठी पाठवला आहे. पोलिसांनी दिलेल्या प्राथमिक माहितीनुसार, ही आग शॉर्टसर्किटमुळे लागली असून, त्यामागे एसीचा स्फोट हे प्रमुख कारण असल्याचे सांगितले जात आहे. पोलीस या प्रकरणाचा सखोल तपास करत आहेत.