Success Story : शेतकऱ्याने 65 दिवसांत करून दाखवलं, 5 लाख रुपयांचा निव्वळ मिळवला नफा, असं काय केलं?

‎शेतकरी शेतात नेहमीच नवनवीन प्रयोग करत असतात. सोलापूर जिल्ह्यातील मोहोळ तालुक्यातील कामती येथील तरुण शेतकरी अतुल घोडके यांनी कलिंगड लागवडीतून अवघ्या 65 दिवसांत 5 लाख रुपयांचा निव्वळ नफा कमावत यशस्वी प्रयोग केला आहे.

सुशिक्षित तरुण नोकरीच्या शोधात शहराकडे वळत असताना अतुल यांनी शेतीतच भविष्य शोधण्याचा निर्णय घेतला. त्याचा हा कलिंगड शेतीचा प्रयोग यशस्वी ठरला.

बारावीपर्यंत शिक्षण पूर्ण केल्यानंतर त्यांनी नोकरीचा शोध घेतला. अपेक्षित नोकरी न मिळाल्याने त्यांनी निराश न होता बाजारपेठेचा अभ्यास केला.

सध्या कलिंगडाला असलेली मागणी लक्षात घेऊन 7 डिसेंबर 2025 रोजी दोन एकर क्षेत्रात सिंबा जातीच्या कलिंगडाची लागवड केली. लागवडीसाठी सुमारे 2 लाख रुपयांचा खर्च आला.

पिकावर भुरी, करपा आणि बोकड्या यांसारखे रोग टाळण्यासाठी दर दोन दिवसांनी फवारणी करत योग्य व्यवस्थापन करण्यात आले. आधुनिक तंत्रज्ञान, नियोजन आणि मेहनतीच्या जोरावर चांगले उत्पादन मिळाले.

सध्या बाजारात कलिंगडाला 25 ते 30 रुपये प्रतिकिलो दर मिळत आहे. खर्च वजा जाता 5 लाख रुपयांचा निव्वळ नफा झाल्याची माहिती अतुल यांनी दिली आहे.

शेतीकडे सकारात्मक दृष्टीने पाहून योग्य पिकाची निवड आणि नियोजन केल्यास शेतीही फायदेशीर ठरू शकते, असा आत्मविश्वास अतुल यांनी व्यक्त केला आहे.