लालपरीची डॉक्टर! एका हातात पाना अन् दुसऱ्यात हातोडा, मेकॅनिकताई नुसत्या आवाजावरून ओळखतात घोटाळा!

कधीकाळी महिलांचं कार्यक्षेत्र हे ‘चूल आणि मूल’ पुरतंच मर्यादित होतं. पण आज पुरुषाच्या खांद्याला खांदा लावून महिला काम करत आहेत. याचं उत्तम उदाहरण म्हणजे आयटीआयपर्यंत शिक्षण घेतलेल्या फरहिद सिकंदर शेख या होय.

सोलापुरातील बस डेपो येथे मेकॅनिक म्हणून फरहिद सिकंदर शेख या काम करत आहे. हातात पाना, हातोडा घेऊन हम भी किसीसे कम नही हे सांगत आज महिला देखील एसटी आगारात मेकॅनिकगिरी करत आहे.

फरहिद सिकंदर शेख यांचे शिक्षण आयटीआय पर्यंत झाले आहे. जेवढे काम एखादा पुरुष कर्मचारी करतो तेवढेच काम फरहिद सिकंदर शेख करतात. नुसत्या गाडी आणि इंजिनाच्या आवाजावरून त्यांना बिघाड काय ते कळतं.

एसटीमध्ये तीन महिन्याला प्रत्येक एसटीची पूर्ण देखभाल केली जाते. याला डॉकिंग म्हटले जाते. स्प्रिंग बदलणे, क्लचप्लेट बदलणे, टायर बदलणे, इंजिनमधील काही तांत्रिक बिघाड असेल तर दुरुस्त करण्याचे काम सोलापुरातील एसटी आगारात फरहिद शेख करत आहेत.

महाराष्ट्र राज्य परिवहन महामंडळाच्या आगारात महिला देखील लालपरीची दुरुस्ती सहजपणे करताना दिसून येत आहे. लालापरीचे टायर बदलण्यापासून ते इंजिनमधील बिघाड शोधून दुरुस्त करण्याचे काम देखील फरहिद करतात.

बस दुरुस्तीच्या कामात सर्व सहकारी मला चांगल्या प्रकारे मदत करत असतात. हे सर्व करत असताना घरची जबाबदारीही मी निभावते. यामुळे कुटुंबीयांची साथही मला मिळते, असं फरहिद शेख सांगतात.

महिलांना जर कुटुंबांची आणि घरची जर साथ मिळाली तर कोणत्याही क्षेत्रात महिला काम करू शकतात. कोणत्या क्षेत्रात आपल्याला काम करायचं आहे त्या कामाचे ज्ञान घेऊन ते कार्य केल्यास नक्कीच यशस्वी होईल, असा सल्ला महिला मेकॅनिक फरहिद शेख यांनी दिला आहे. (इरफान पटेल, प्रतिनिधी)