OTT Top Trending : थिएटरमध्ये आपटला, ओटीटीवर टॉप ट्रेडिंग आहे बाळासाहेब ठाकरेंच्या नातवाचा सिनेमा, कुठे पाहाल?

? सध्या ओटीटीचा जमाना आहे. अनेक सिनेमे मधल्या काळात रिलीज झाले. अनेक सिनेमे बॉक्स ऑफिसवर जोरदार आपटले. असाच एक सिनेमा काही दिवसांआधी रिलीज झाला होता. या सिनेमाकडून प्रेक्षकांना खूप अपेक्षा होत्या. मात्र थिएटरमध्ये हा सिनेमा फारसा चालला नाही. पण हाच सिनेमा आता ओटीटीवर टॉप ट्रेडिंगमध्ये आहे.

शिवसेनेचे संस्थापक दिवंगत नेते बाळासाहेब ठाकरे यांचा नातू ऐश्वर्य ठाकरे यानं बॉलिवूडमध्ये डेब्यू केला. निशांची हा त्याचा सिनेमा  19 सप्टेंबरला रिलीज झाला. बाळासाहेबांचा नातू असल्याने या सिनेमावेळी ऐश्वर्य ठाकरे प्रचंड चर्चेत होता. त्याचा सिनेमा देखील त्याच्यासारखाच चर्चेत येईल असं सर्वांना वाटलं होतं. मात्र निशांची हा सिनेमा बॉक्स ऑफिसवर सप्शेल आपटला.

थिएटरमध्ये जरी ऐश्वर्य ठाकरेच्या निशांची सिनेमाकडे प्रेक्षकांनी पाठ फिरवली असली तरी ओटीटीवर मात्र या सिनेमाची खरी जादू प्रेक्षकांना कळली आहे. ओटीटीवर रिलीज होताच निशांची सिनेमानं टॉप ट्रेडिंग सिनेमांच्या यादीत आपलं नाव कमावलं आहे.

निशांची पार्ट 1 आणि 2 हे दोन्ही भाग 14 नोव्हेंबर रोजी भारतात आणि जगभरातील 240 हून अधिक देश व प्रदेशांमध्ये ओटीटीच्या माध्यमातून रिलीज करण्यात आला. दुहेरी नाट्य, ॲक्शन आणि इमोशनचा पावर पॅक असलेला हा सिनेमा प्रेक्षकांनी घरबसल्या पाहिला आणि त्याला पसंती देखील दर्शवली.

अनुराग कश्यप दिग्दर्शित आणि प्रसून मिश्रा, रंजन चंदेल आणि अनुराग कश्यप लिखित या सिनेमात ऐश्वर्य ठाकरेचा डबल रोल दाखवण्यात आला आहे. ऐश्वर्याबरोबर सिनेमात वेदिका पिंटो, मोनिका पंवार, मोहम्मद झीशान अय्यूब, कुमुद मिश्रा आणि विनीत कुमार सिंग यांच्या महत्वाच्या भूमिका आहेत.

निशांची हा दोन भागांचा सिनेमा आहे.  एकसारखा चेहरा पण पूर्णतः भिन्न स्वभावाच्या जुळ्या भावांची ही स्टोरी आहे. बंधुत्व, विश्वासघात, प्रेम आणि मुक्ती यांची गुन्हे-जगाच्या पार्श्वभूमीवर उभी केलेली ही कथा आहे. पार्ट 1 मध्ये मंजीरी (मोनिका पंवार), एक माजी ट्रॅप शार्पशूटर, आणि तिचे जुळे मुलगे बबलू आणि डबलू (दोन्ही भूमिका ऐश्वर्य ठाकरे)  यांची ओळख करून दिली जाते. एक जाज्वल्य व महत्त्वाकांक्षी, तर दुसरा शांत व संभ्रमित.

अंबिका प्रसाद (कुमुद मिश्रा) यांच्या गँगमध्ये बबलू ओढला जातो आणि रिंकू (वेदिका पिंटो) वर प्रेम झाल्यानंतर त्याचे आयुष्य नियंत्रणाबाहेर जाते.  रिंकू ही त्याने कधीकाळी ठार केलेल्या व्यक्तीची मुलगी असते. अपराध आणि सूडाच्या संघर्षात त्याचे आयुष्य गुंतून जाते.

पार्ट 2 हिच स्टोरी पुढे घेऊन जातो. जिथे बबलू मुक्ती शोधत असतो पण पुन्हा अंबिकाच्या जगात खेचला जातो आणि शेवटी दबलेल्या सत्यांचा उद्रेक होऊन न्यायाची निर्णायक परिणती घडते.

प्रभावी अभिनय, मनाला भिडणारं संगीत आणि पारंपरिक देसी रंग यांनी सजलेला निशांची हा सिनेमा तुम्ही प्राइम व्हिडिओवर पाहू शकता. प्राइम व्हिडिओने आज निशांची या Amazon MGM Studios India च्या देसी मसाला एंटरटेनरमेंटवर हा सिनेमा रिलीज करण्यात आला आहे.