Best Crime Thriller : सत्य घटनांवर बनल्या थरकाप उडवणाऱ्या सीरीज, प्रत्येक कहाणी पाहून हातपाय गार पडतील, 5 वी मस्ट वॉच

मुंबई: अनेकांना पडद्यावरील क्राइम स्टोरीज पाहायला आवडते. पण जेव्हा आपण पाहत आहोत ती कथा फक्त कथा नसून, वास्तवात घडलेली घटना आहे, हे कळते, तेव्हा थरार शिगेला पोहोचतो. भारतात गाजलेल्या आणि देशाला हादरवून सोडलेल्या अशा काही सत्य घटनांवर आधारित क्राईम डॉक्युमेंट्री सिरीज ओटीटीवर उपलब्ध आहेत, ज्यातील प्रत्येक सीरिज तुम्हाला हादरवून सोडेल. सत्याचा शोध, क्रूरता, आणि मृत्यूचे गूढ उलगडणाऱ्या, या ७ 'मस्ट वॉच' क्राईम सिरीज.

दिल्ली क्राईम (Delhi Crime): ही सिरीज २०१२ मधील निर्भया सामूहिक बलात्कार प्रकरणाची आणि त्यानंतरच्या पोलीस तपासाची भयानक कहाणी सांगते. केवळ गुन्ह्याचा क्रूरपणा नव्हे, तर न्यायाच्या शोधातील पोलीस दलाचा संघर्ष पाहताना तुमची वेदना वाढेल. ही सिरीज नेटफ्लिक्सवर उपलब्ध आहे.

हाऊस ऑफ सीक्रेट्स- द बुरारी डेथ्स (House of Secrets- The Burari Deaths): दिल्लीतील एकाच कुटुंबातील ११ सदस्यांनी सामूहिक आत्महत्या केल्याचा गूढ आणि थरारक तपास या सिरीजमध्ये आहे. कुटुंबातील रहस्यांची, अंधश्रद्धेची आणि अलौकिक शक्तींची किनार असलेली ही कहाणी नक्कीच तुमची झोप उडवेल. ही सिरीज नेटफ्लिक्सवर उपलब्ध आहे.

डान्सिंग ऑन द ग्रेव्ह (Dancing on the Grave): १९९० च्या दशकातील बंगळूरुमधील एका हाय-प्रोफाइल सोशलाईट महिलेचे हत्याकांड या सिरीजमध्ये दाखवण्यात आले आहे. या प्रकरणात प्रेम, विश्वासघात, आणि आर्थिक लोभ कसे एका भयानक गुन्ह्यात बदलले, हे पाहायला मिळते. ही सिरीज अमेझॉन प्राईम व्हिडीओवर उपलब्ध आहे.

क्राईम स्टोरीज - इंडिया डिटेक्टिव्हज (Crime Stories - India Detectives): ही सिरीज बंगळूरु पोलिसांचा पडद्यामागील खऱ्या घटनांचा तपास दाखवते. यामध्ये केवळ गुन्हे नव्हे, तर पीडितांचे आणि तपास अधिकाऱ्यांचे मानवी दुःख अनुभवता येते. ही सिरीज नेटफ्लिक्सवर उपलब्ध आहे.

मानवत मर्डर्स (Manwat Murders): १९७० च्या महाराष्ट्रातील ग्रामीण भागातील क्रूर आणि बर्बर हत्याकांडावर आधारित ही सिरीज अंधश्रद्धा आणि नरबळीच्या काळ्या बाजूचा थरार दाखवते. मराठी मातीतील ही सत्य घटना तुम्हाला सुन्न करेल. ही सिरीज सोनी लिव्हवर उपलब्ध आहे.

द इंद्राणी मुखर्जी (The Indrani Mukerjee): शीना बोरा हत्याकांडाने संपूर्ण देश हादरला होता. एका उच्चभ्रू कुटुंबातील महिलेने आपल्या मुलीचीच हत्या केल्याचा आरोप, कोर्टरूम ड्रामा आणि कौटुंबिक रहस्यांची ही कथा तुम्हाला विचार करायला लावेल. ही सिरीज नेटफ्लिक्सवर उपलब्ध आहे.

इंडियन प्रिडेटर (Indian Predator): ही अँथॉलॉजी सिरीज भारतातील सर्वात भयानक सीरियल किलर्सच्या कृत्यांचा आणि त्यांच्या मानसिकतेचा शोध घेते. पोलिसांना आव्हान देणाऱ्या 'बुचर ऑफ दिल्ली' पासून ते अनेक हत्या करणाऱ्या राजा कोलंदरपर्यंतच्या प्रकरणांचे सत्य या सिरीजमध्ये दाखवण्यात आले आहे. ही सिरीज नेटफ्लिक्सवर उपलब्ध आहे.