'कालच्या पोरींनी यावं आणि...', सागरला नको नको ते बोलणाऱ्या तन्वीवर विशाखा सुभेदारचा हल्लाबोल, चांगलंच झापलं

सर्वाधिक वादग्रस्त मानल्या जाणाऱ्या बिग बॉस या गेम शोची फॅन फोलोविंग खूप मोठी आहे. कितीही टीका झाली तरीही दरवर्षी हा शो त्याच उत्साहाने पाहिला जातो. नुकतंच बिग बॉस मराठीचं सहावं पर्व सुरू झालं असून एक आठवडा पूर्ण होत नाही, तोच घरामध्ये दररोज नवे भूकंप पाहायला मिळत आहेत. यंदाच्या सीझनमध्ये नवख्या कलाकारांनी आणि नव्या चेहऱ्यांनी आपलं स्थान मिळवलं आहे.

काही दिवसांपूर्वी घरात सीझनचा पहिला नॉमिनेशन टास्क झाला. यामध्ये कॅप्टन्सीचे उमेदवार असलेल्या स्पर्धकांनी कोणत्याही दोन स्पर्धकांना नॉमिनेट करायचं होतं. यावेळी तन्वी कोल्तेने अभिनेता सागर कारंडेला नॉमिनेट केलं.

यानंतर तन्वी आणि सागर या दोघांमध्ये वातावरण तापल्याचं पाहायला मिळालं. गेली कित्येक वर्षे प्रेक्षकांना खळखळून हसवणाऱ्या सागरला सर्वांनी पहिल्यांदाच इतकं संतापलेलं पाहिलं असेल. यावेळी तन्वीने सागरशी अरेरावीही केली.

दुसऱ्या दिवशी घडलेल्या प्रकारामुळे तन्वीला रडू आलं आणि सागरशी शांतपणे बोलून तिने त्यांच्यातील भांडणही संपवलं. मात्र, त्यानंतर काही तासांतच झालेल्या कॅप्टन्सी टास्कमध्ये सागर आणि तन्वी यांच्या पुन्हा भडका उडाल्याचं पाहायला मिळालं. टास्कच्या गरमागरमीत तन्वी आणि सागर यांचा आवाज चढला. तन्वी थेट सागरच्या प्रोफेशनवर गेली आणि सागर तिच्यावर धावून आला.

कॅप्टन्सीच्या ‘बीबी फार्म’ टास्कदरम्यान तन्वी सागरला कारंडेला म्हणते, “हा टास्क थांबवलाय. मी तुझ्यावर लक्ष ठेवून आहे. तू कॉमेडी करत जातोस. तुला काय वाटतं का कॉमेडी करतोस.” यानंतर सागर कारंडे म्हणाला, “माझं ते प्रोफेशन आहे. कॉमेडी हे माझं काम आहे.” यानंतर या वादात घरातल्या इतर सदस्यांनी मध्यस्थी केली.

दिपाली सय्यदनेही तन्वीला प्रोफेशनवर कमेंट करू नकोस असा इशारा दिला. मात्र, घरातील वातावरण पाहताच तन्वीने आपले शब्द फिरवले, “तो कॉमेडी करून भांडणं मिटवतो असं मी बोलत होते.” इतकंच नाही, तर बिग बॉसच्या कॅमेऱ्यासमोर येऊन देखील तन्वीने याबद्दल स्पष्टीकरण दिलं.

तथापि, तन्वीच्या या वागण्यावर सोशल मीडियावरही संतप्त प्रतिक्रिया येताना दिसत आहेत. अनेक कलाकारांनीही सागरची बाजू घेत तन्वीची शाळा घेतली. आता याच वादात सागरची जुनी सहकलाकार विशाखा सुभेदारने उडी घेत तन्वीला चांगलंच सुनावलं आहे.

विशाखाने फेसबुकवर एक जळजळीत पोस्ट लिहिली, "सागर कारंडे, मस्त खेळतोयस रे.. कॉमेडी करतो..? जाम हलक्यात घेतात विनोदी कलाकारला.. कोणीही कालच्या पोरींनी यावं टपली मारुन जावं...! ह्यांनी काय अनुभवलंय ?? असं किती काम केलं??"

विशाखा पुढे म्हणाली, "असो.. शब्द पलटवले तिने नंतर..! पण ही तन्वी पहिल्याच आठवड्यात साधारण 10 व्या week ला खेळतेय असं का खेळतेय? लगेचच दुसऱ्यांना तू मला सपोर्ट करणार का वैगरे??? अगं असं काय केलंयस इतरांसाठी कीं तू त्यांच्याशी डील करतेयस.. आधी "दिल" तर जिंक त्यांचं..! ते मला वाटतं तिला शक्य नाही.. किरकिर कर्कश आवाज..! शी."

दरम्यान, तन्वी कोल्तेचं प्रत्येक सिनिअर कलाकारांशी होत असलेले मतभेद आणि भांडणांमधील तिची आक्रमक भाषा यामुळे तिची तुलना मागच्या सीझनमधील जान्हवी किल्लेकरसोबत केली जात आहे. आता येणाऱ्या भाऊच्या धक्क्यावर तन्वीला रितेश भाऊंकडून बोलणी खावी लागणार का हे पाहणं महत्त्वाचं ठरणार आहे.