"हिरो हिरोईनचे दिवस आता संपले"; Cannes गाजवणाऱ्या छाया कदम यांचं मोठं वक्तव्य

सैराट, न्यूड, लापता लेडीज सारख्या अनेक मराठी तसंच हिंदी सिनेमा आणि वेब सीरिजमधून आपल्या अभिनयाची ताकद दाखवून देणाऱ्या अभिनेत्री छाया कदम सध्या कान फिल्म फेस्टिव्हलमुळे चर्चेत आहेत.

सातासमुद्रापार कानमध्ये मराठीचा झेंडा गाजवणाऱ्या छाया कदम यांनी सिनेमातील हिरो हिरोईन आणि कॉन्टेट विषयी महत्त्वाचं वक्तव्य केलं आहे.

बीबीसी मराठीशी बोलताना छाया कदम म्हणाल्या, "हिरो हिरोईनवाले दिवस आता गेलेत असं मला वाटतं. आता लोकांना माणसांची गोष्ट बघायला आवडते. तुम्हाला आजूबाजूचं जगणं बघायला आवडतं".

"लोकांना आता कळतं की ते खोटं आहे. असं कसं होऊ शकतं ना, की तिथे माणूस मेलाय आणि इतके बाई छान गजरा माळून रडतेय".

"असं कसं होऊ शकते. किंवा फुल्ल मेकअप करुन भाजी मोडतोय. बऱ्याच सीरियल्समध्ये बायका जेवण करताना दिसतंच नाहीत. मग त्या खात कशा असतील असा प्रश्न पडतो".

"ज्या जेवण करताना दाखवतात त्या फुल्ल एकदम तयार होऊन करत असतात. त्यामुळे आधी होतं ते होरो हिरोईनवालं आता तुमची कथा तुमचा हिरो झाली आहे".