Guess Who : 90s ची फेमस अभिनेत्री, सेटवर झालेली मोलकरीण, जमिनीवर बसून जेवायची

शबाना आझमी हिंदी चित्रपटसृष्टीतील ज्येष्ठ अभिनेत्रींपैकी एक आहेत. त्यांच्याशी संबंधित अनेक किस्से सिनेजगतामध्ये चर्चेचा विषय बनत असतात. आज आम्ही तुम्हाला शबानाशी संबंधित असा एक किस्सा सांगणार आहोत. अभिनेत्रीने नुकताच याबद्दल खुलासा केला आहे.

शबाना आझमी यांनी सांगितले की हिंदी सिनेसृष्टीतील एक दिग्गज दिग्दर्शक त्यांना जमिनीवर बसून जेवायला भाग पाडायचे. अभिनेत्रीच्या या वक्तव्यानंतर हा नेमका काय किस्सा आहे हे जाणून घेण्याची चाहत्यांना आता उत्सुकता आहे.

एखादा चांगला दिग्दर्शक आपला सिनेमा उत्तम करण्यासाठी त्यावर प्रचंड मेहनत घेत असतो. कलाकारांनाही ते चित्रपटासाठी मेहनत घ्यायला सांगतात. कलाकार साकारत असलेल्या पात्राला ते योग्य न्याय कसा देतील यासाठी ते प्रयत्नशील असतात. अभिनेत्री शबाना आझमी यांच्यामते दिवंगत फिल्ममेकर श्याम बेनेगल हे त्यापैकीच एक. दिग्दर्शक म्हणून त्यांची काम करण्याची वेगळी पद्धत होती. श्याम बेनेगल यांच्या 'अंकुर' या चित्रपटाच्या माध्यमातून शबाना आझमी यांनी बॉलिवूडमध्ये पदार्पण केलं होतं.

शबाना आझमी श्याम बेनेगल यांच्याबद्दलचा एक किस्सा सांगताना म्हणाल्या,"श्याम बेनेगल खूप चांगले, प्रेमळ आणि बुद्धिमान व्यक्ती होते. मी आयुष्यात पहिल्यांदा हैदराबादपासून सुमारे 30 किमी दूर असलेल्या येल्ला रेड्डी गुडा गावात गेले होते. तिथे गेल्यावर त्यांनी मला सांगितले की तू गावातील महिलांसारखी साडी नेसून इथे फिर, जेणेकरून तू या वातावरणाला सहज आपलंसं करशील".

शबाना आझमी पुढे म्हणाल्या,"मला गुडघ्यांचा त्रास असल्याने खाली बसायला अडचण होती. पण 'अंकुर' चित्रपटाच्या 60% भागात मला जमिनीवर बसावं लागलं होतं. त्यामुळे दिग्दर्शक श्याम यांनी मला सांगितलं होतं की जेवतानाही तू जमिनीवर बसून जेवण कर".

शबाना आझमी एक किस्सा शेअर करत म्हणाल्या,"चित्रपटाच्या शूटिंगदरम्यान माझे काही कॉलेजचे मित्र सेटवर मला भेटायला आले होते. त्यावेळी मी कुठे आहे? असा प्रश्न त्यांनी मलाच केला. मी त्यांना सांगितले की, आज तिची सुट्टी आहे". पुढे त्यांनी मला विचारलं,"तू कोण?". यावर मी त्यांना मी इथली मोलकरीण असं उत्तर दिलं. त्यानंतर ते निघून गेले. श्याम बेनेगल हे सगळं तिरप्या नजरेने पाहत होते. मग त्यांनी मला सांगितले, “तू त्या मुलांना विश्वास बसवला की तू मोलकरीण आहेस. आता तू आमच्यासोबत टेबलावर बसून जेवण करू शकतेस".

शबाना आझमी काही दिवसांपूर्वी नेटफ्लिक्सवर आलेल्या 'डिब्बा कार्टेल' या सीरिजमध्ये झळकल्या होत्या. लवकरच या सीरिजचा दुसरा सीझन येणार आहे. शबाना आझमी यांच्या आगामी सीरिज आणि चित्रपटांची चाहत्यांना आता उत्सुकता आहे.