'तारक मेहता का उल्टा चश्मा' सोडल्यानंतर कुठे आहे रीटा रिपोर्टर? आता केलाय हा रेकॉर्ड, जगतेय असं आयुष्य

'तारक मेहता का उल्टा चश्मा' या मालिकेच्या माध्यमातून रीटा रिपोर्टर घराघरांत पोहोचली. ही भूमिका साकारणाऱ्या प्रिया आहूजा रजदाने आपल्या बेधडक अभिनयाने घराघरात वेगळी ओळख निर्माण केली होती. प्रिया 2009 ते 2010 या काळात मालिकेचा भाग होती. त्यानंतर 2013 ते 2022 पर्यंत सातत्याने मालिकेत ती दिसत राहिली.

प्रिया आहूजा रजदाने काही कारणाने 'तारक मेहता का उल्टा चश्मा' ही मालिका सोडली. मालिका सोडल्यानंतरही अभिनेत्रीची लोकप्रियता कमी झालेली नाही. प्रिया सोशल मीडियावर चांगलीच सक्रीय आहे. आपल्या आयुष्यातील प्रत्येक अपडेट सोशल मीडियाच्या माध्यमातून ती चाहत्यांसोबत शेअर करत असते. आता प्रिया पुन्हा एका खास कारणामुळे चर्चेत आहे. नुकतेच तिचे नाव एशिया बुक ऑफ रेकॉर्ड्समध्ये समाविष्ट झाले आहे.

प्रिया आहूजा रजदाने वेटेड प्लँकमध्ये नवा विक्रम केला असून 60 किलो वजन पाठीवर ठेवून सर्वांना आश्चर्यचकित केले. या यशाची माहिती तिने सोशल मीडियाच्या माध्यमातून चाहत्यांना दिली आणि सांगितले की आपल्या 40 व्या वाढदिवसानिमित्त तिला काहीतरी खास करायचे होते.

प्रियाचं म्हणणं आहे की लोक बहुतांश वेळा मानून चालतात की आई झाल्यानंतर किंवा 40 वर्षांनंतर खूप काही करणे अवघड असते, पण तसे अजिबात नाही. प्रियाने सांगितले की फक्त एका आठवड्यात तिने 20 किलोपासून 60 किलोपर्यंतचे वजन उचलण्याचा सराव करून दाखवला.

प्रियाला 75 किलो वजनासह महिला कॅटेगरीमध्ये रेकॉर्ड करायचा होता. सुरुवातीला हे सगळे मजेत सुरू झाले होते, पण नंतर ती या आव्हानाबद्दल पूर्णपणे गंभीर झाली. आता ती 60 किलो वजन सहज उचलते आणि लवकरच 75 किलोपर्यंत पोहोचण्याचा तिचा प्रयत्न आहे. या यशाचे श्रेय प्रिया आपला पती मालव रजदाला देते. कारण पतीने मुलाकडे लक्ष दिल्याने प्रियाला कोणत्याही अडथळ्याशिवाय ट्रेनिंग करता आली.

प्रिया सध्या मालिकाविश्वापासून दूर आहे. पण सोशल मीडियावर खूप सक्रिय आहे. सोशल मीडियाच्या माध्यमातून आपल्या आयुष्यातील घडामोडी ती चाहत्यांसोबत शेअर करत असते. तिचे ग्लॅमरस फोटोही चाहत्यांच्या पसंतीस उतरतात.

प्रिया फिटनेस फ्रीक आहे आणि जिममध्ये वर्कआउट करण्यात बराच वेळ घालवते. इतकेच नाही, तर प्रिया आहूजा आता एक बिझनेसवूमनही आहे. तिचं स्वतःचं कॅफे आहे, जिथे अनेक स्वादिष्ट पदार्थ मिळतात. सध्या आपल्या मुलासोबत जास्तीत जास्त वेळ घालवताना प्रिया दिसते.