Girija Oak's Husband : 24 तासांत देशाला लावलंय याड... इंटरनेट सेन्सेशन बनलेल्या गिरीजा ओकचा पती करतो तरी काय?

मुंबई: मराठी अभिनेत्री गिरिजा ओक-गोडबोले सध्या एका व्हायरल व्हिडिओमुळे रातोरात नॅशनल सेन्सेशन बनली आहे. तिच्या आकाशी साडीतील लूक आणि मनमोहक संवादशैलीवर चाहते फिदा झाले आहेत. मात्र इंटरनेटवर व्हायरल झालेल्या या ३७ वर्षीय सुंदरीचा पती कोण आहे आणि तो काय करतो, याबाबत प्रत्येकालाच उत्सुकता लागून राहिली आहे.

अभिनेते गिरीश ओक यांची कन्या आणि सुप्रसिद्ध दिग्दर्शक श्रीरंग गोडबोले यांची सून असलेल्या गिरिजाची लव्हस्टोरी देखील तिच्यासारखीच झक्कास आणि रंजक आहे.

गिरिजाने २०११ मध्ये सुहृद गोडबोले यांच्याशी लग्न केले. दोघांना एक मुलगा आहे. सुहृद गोडबोले हे मराठी मनोरंजन विश्वातील एक महत्त्वाचे नाव आहे. ते चित्रपट आणि नाट्यनिर्माते, लेखक, दिग्दर्शक आणि अभिनेता म्हणून कार्यरत आहेत.

त्यांनी गीतकार आणि इव्हेंट डिझायनर म्हणूनही काम केले आहे. विशेष म्हणजे, ते दिग्दर्शक श्रीरंग गोडबोले यांचे पुत्र असून त्यांना आपल्या वडिलांकडूनच कलेचा वारसा मिळाला आहे.

गिरिजा आणि सुहृद यांची पहिली भेट २००८ मध्ये आदित्य सरपोतदारच्या साखरपुड्यामध्ये झाली होती. एका मुलाखतीत सुहृदने सांगितले की, "तेव्हा गिरिजा 'तारे जमीन पर'ची अभिनेत्री म्हणून माहीत होती आणि ती तिच्या बॉयफ्रेंडसोबत आली होती." त्यामुळे दोघांमध्ये काही विशेष बोलणे झाले नाही.

पुढे एका प्रोजेक्टच्या कामासाठी सुहृदने जेव्हा गिरिजाला फोन केला, तेव्हा आवाज ऐकून 'पन्नाशीतील व्यक्ती बोलतेय' असे गिरिजाला वाटले होते. गोव्यात शूटिंगदरम्यान दोघांची प्रत्यक्ष भेट झाली. गिरिजाने सांगितले, "आम्ही गोव्यात काही खरेदी करत असताना, बिलिंग करताना दोघांचीही गणिताची बोंब असल्याचे लक्षात आले. तेव्हाच आमचे ठरले की आमच्या नावडी सेम आहेत."

पुढे त्यांची मैत्री प्रेमात बदलली. पण जेव्हा दोघांनी लग्न करण्याचे ठरवले, तेव्हा गिरिजाच्या आयुष्यातील कौटुंबिक परिस्थिती थोडी गुंतागुंतीची होती, कारण तिचे आई-वडील दोघेही वेगळे झाले होते आणि दोघांचेही नवीन संसार सुरू होते.

गिरिजा आणि सुहृदला साधे रजिस्टर लग्न करायचे होते. तिचा लग्नाच्या खर्चाऐवजी युरोप ट्रिप करण्याचा विचार होता. यावर गिरिजाचे सासरे श्रीरंग गोडबोले यांनी तर "तुम्ही पळून जाऊन कोर्टात लग्न करा, म्हणजे कोणालाच खर्च नको!" असा मजेशीर सल्ला दिला होता. अखेर, गिरिजा आणि सुहृद यांनी कुटुंबिय आणि मित्रपरिवाराच्या साक्षीने २०११ साली लग्नगाठ बांधली.