Peas : मटार वर्षभर ताजे रहाण्यासाठी फ्रीजमध्ये ठेवायचे की फ्रीजरला? योग्य पद्धत आणि ही छोटी ट्रिक ठेवा लक्षात

थंडीचा मौसम सुरू झाला की बाजारात हिरवीगार आणि टपोरी मटार दिसू लागतात. मटार ही अशी एक भाजी आहे, जिचा वापर अनेक पदार्थांमध्ये केला जातो. मग ती मटारची भाजी असो, मटार पराठे, पुलाव असो वा इतर कोणताही भाताचा पदार्थ, मटारने पदार्थाची चव वाढतेच. अनेकदा आपल्याला मटार खूप आवडते आणि ती केवळ सिझनल असल्याने, आपण जास्त प्रमाणात विकत घेतो. पण जास्त मटार आणल्यावर ती खराब होऊ नये म्हणून कशी साठवायची, हा प्रश्न गृहिणींना पडतो.

मटार जास्त काळ ताजी आणि हिरवीगार ठेवण्यासाठी योग्य पद्धत जाणून घेणे खूप महत्त्वाचे आहे. चला तर मग, जाणून घेऊया मटार साठवण्याचे काही सोपे आणि प्रभावी मार्ग, जेणेकरून ते लवकर खराब होणार नाही.

मटार साठवण्यासाठी फ्रीज की फ्रीजर कोणता पर्याय उत्तम?तुम्हाला मटार किती दिवसांसाठी साठवायची आहे, यावर कोणता पर्याय निवडायचा हे ठरते.

1. फ्रीजमध्ये मटार साठवणे (कमी कालावधीसाठी)जर तुम्हाला मटार 3-4 दिवसांच्या आत वापरायची असेल, तर फ्रीजमध्ये साठवणे हा उत्तम पर्याय आहे.पद्धत: सोललेली मटार एखाद्या पॉलीथिन बॅगमध्ये किंवा एअरटाइट डब्यात ठेवा.

ओलाव्यापासून संरक्षण :मटारमध्ये ओलावा येऊ नये आणि ती खराब होऊ नये म्हणून, बॅगेत किंवा डब्यात एक पेपर टॉवेल ठेऊ शकता. पेपर टॉवेल अतिरिक्त ओलावा शोषून घेतो.

2. फ्रीजरमध्ये मटार साठवणे (दीर्घ कालावधीसाठी)जर तुम्हाला मटार अनेक आठवडे किंवा महिनोनमहिने ताजी ठेवायची असेल, तर फ्रीजर हा सर्वात योग्य पर्याय आहे. यासाठी मटारला 'ब्लांच' (Blanch) करणे महत्त्वाचे आहे.

ब्लांचिंग प्रक्रिया (Blanching Process):एका मोठ्या भांड्यात पाणी उकळायला ठेवा.पाण्याला चांगली उकळी आली की, त्यात सोललेली मटार घाला. मटारला फक्त 2-3 मिनिटे उकळत्या पाण्यात ठेवा. जास्त वेळ उकळू नका.2-3 मिनिटांनंतर, लगेच मटार उकळत्या पाण्यातून काढून चिल्ड (खूप थंड) किंवा बर्फाच्या पाण्यात टाका. यामुळे मटारची शिजण्याची प्रक्रिया थांबते आणि तिचा हिरवागार रंग तसाच राहतो.थंड झाल्यावर मटार पाण्यातून काढून घ्या आणि ती पूर्णपणे कोरडी होऊ द्या. तुम्ही किचन टॉवेलवर पसरवून कोरडी करू शकता.पॅकिंग: मटार पूर्णपणे सुकल्यानंतर ती एअरटाइट फ्रीजर बॅगमध्ये (Air tight freezer bag) किंवा डब्यात पॅक करा.टिकाऊपणा: या पद्धतीने साठवलेली मटार ६-८ महिन्यांपर्यंत ताजी राहते आणि तिचा स्वाद व रंगही टिकून राहतो.

ब्लांचिंग करणे का महत्त्वाचे आहे?ब्लांचिंग केल्याने मटारचा नैसर्गिक रंग, त्याचा गोडसर स्वाद आणि त्यातील पोषक तत्वे दीर्घकाळ सुरक्षित राहतात. ब्लांच न करता थेट फ्रीजमध्ये ठेवल्यास मटार लवकर खराब होऊ शकते, त्याचा रंग बदलू शकतो आणि चवही बिघडू शकते.

तारीख लिहा: फ्रीजर बॅगवर तुम्ही मटार कधी ठेवले आहे, त्याची तारीख लिहा. त्यामुळे ते कधीपर्यंत वापरायची आहे, याची कल्पना येईल.

पुन्हा गोठवू नका: एकदा फ्रीजमधून बाहेर काढलेली मटार पुन्हा डीफ्रॉस्ट (Defrost) करून रिफ्रीज (Refreeze) करू नका. यामुळे मटारची चव आणि टेक्सचर (पोत) खराब होते.

आवश्यकतेनुसार वापरा: एका वेळी लागेल तितकीच मटार फ्रीजमधून बाहेर काढा.या सोप्या पद्धतींचा अवलंब करून तुम्ही आणलेली मटार अनेक दिवसांपर्यंत सुरक्षित आणि ताजी ठेवू शकता, ज्यामुळे ते खराबही होणार नाही आणि तुम्हाला वर्षभर तिच्या गोड चवीचा आनंद घेता येईल.