Sugar Vs Jaggery Tea : साखरेऐवजी गूळ टाकला म्हणजे चहा हेल्दी होतो का? डॉक्टर काय सांगतात

सकाळची सुरुवात चहाच्या कपाशिवाय होऊच शकत नाही, खरं ना? अनेकांसाठी तर सकाळचा चहा मिस झाला तर मग दिवस खराब जातो. पण आजकाल फिट राहण्याच्या नादात लोक चहा पिण्याच्या पद्धतीत बरेच बदल करत आहेत. साखर आरोग्याला वाईट असते म्हणून आपल्यापैकी अनेकांनी चहातून साखर हद्दपार केली आणि त्याची जागा घेतली गुळाने. आपल्याला वाटतं की गुळाचा चहा म्हणजे अगदी अमृतच आपण अगदी अभिमानाने सांगतो, मी साखर घेत नाही, गुळाचा चहा पितो/पिते.

पण कधी विचार केलाय का की, फक्त साखर बदलली म्हणून चहा खरंच आरोग्यदायी होतो का? की आपण फक्त मनाला समाधान देण्यासाठी ही धडपड करतोय? चहाच्या टपरीवर किंवा घराघरात आजकाल गुळाच्या चहाची फॅशन आली आहे, पण यामागचं खरं वास्तव काय आहे आणि डॉक्टर याबद्दल काय इशारा देतात, हे आज आपण समजून घेऊया.

मुळात साखर आणि गूळ दोन्ही उसापासूनच बनतात. साखरेवर खूप प्रक्रिया केली जाते, ज्यामुळे त्यातील पोषक तत्वे निघून जातात आणि उरतात त्या फक्त रिकाम्या कॅलरीज. याउलट गूळ कमी प्रक्रियेतून बनतो, त्यामुळे त्यात थोड्या प्रमाणात लोह (Iron), पोटॅशियम आणि मॅग्नेशियम असतं.

पण... इथेच एक महत्त्वाची गोष्ट आपण विसरतो. दोन्हींमध्ये असणाऱ्या 'कॅलरीज' जवळपास सारख्याच असतात. त्यामुळे जर तुम्हाला वाटत असेल की गुळाचा चहा प्यायल्याने वजन कमी होईल, तर तो एक मोठा गैरसमज आहे.

डॉक्टर काय सांगतात?1. कॅलरीजचा हिशोब: एक चमचा साखरेत जेवढी ऊर्जा असते, जवळपास तितकीच एक चमचा गुळातही असते. त्यामुळे जर तुम्ही मधुमेही (Diabetic) असाल, तर गुळाचा चहाही तुमच्या रक्तातील साखर वाढवू शकतो.2. पचनशक्ती आणि गूळ: आयुर्वेदानुसार, गुळामुळे पचन सुधारतं आणि शरीराला थोडी उष्णता मिळते. हिवाळ्यात गुळाचा चहा घेणं एकवेळ ठीक आहे, पण उन्हाळ्यात तो अतिप्रमाणात घेतल्यास नाकातून रक्त येणे किंवा उष्णतेचे त्रास होऊ शकतात.3. दुधासोबतचं कॉम्बिनेशन: आपण अनेकदा चहा उकळतानाच त्यात गूळ टाकतो, ज्यामुळे चहा फुटतो. पण दुधासोबत गूळ एकत्र करणं हे आयुर्वेदानुसार 'विरुद्ध आहार' मानलं जातं, ज्यामुळे काहींना त्वचेचे विकार किंवा पोटाचे त्रास होऊ शकतात.

गुळाचा चहा पिणाऱ्यांनी 'या' गोष्टी लक्षात ठेवाव्याजर तुम्ही फिट राहण्यासाठी गुळाचा चहा घेत असाल, तर लक्षात ठेवा की अतिप्रमाण नेहमीच वाईट असतं.गुळाचा चहा बनवताना आधी चहा उकळून घ्या आणि कपामध्ये चहा गाळल्यानंतर वरून गूळ टाका, यामुळे चहा फुटत नाही आणि गुळाचे गुणधर्म टिकून राहतात.जर तुम्हाला मधुमेह असेल, तर गुळाचा चहा घेण्यापूर्वी आपल्या डॉक्टरांचा सल्ला नक्की घ्या.

आपल्याला वाटतं गूळ चांगला आहे म्हणून आपण चहात गुळाचे मोठे खडे टाकतो. साखर असताना आपण कदाचित एकच चमचा घेतली असती, पण गूळ हेल्दी आहे असं समजून गुळ जास्त टाकते किंवा चहा जास्त पितो. त्यामुळे त्याचा शरीराला फारसा फायदा होतच नाही.

थोडक्यात सांगायचं तर, साखर सोडून गुळाकडे वळणं हा एक छोटा बदल आहे, पण तो चहाला 'मॅजिक ड्रिंक' बनवत नाही. गूळ साखरेपेक्षा नक्कीच थोडा सरस आहे कारण त्यात काही खनिजे आहेत, पण शेवटी तो सुद्धा एक प्रकारचा 'गोडवाच' आहे. त्यामुळे चवीसाठी जरूर प्या, पण 'हेल्दी' म्हणून त्याचा अतिरेक करू नका.