दिल्लीच्या दिशेने टाकलेल्या मिसाईलचे उद्ध्वस्त तुकडे सापडले, घटनास्थळी पोलीस पोहोचले

भारत आणि पाकिस्तानमध्ये युद्धाची आग आता आणखी भडकली आहे. पाकिस्तानकडून सतत ड्रोन हल्ले आणि गोळीबार सुरू आहे. शुक्रवारी पुन्हा एकदा अंधारात पाकिस्तानने भारतातील २६ ठिकाणांवर ड्रोन हल्ले केले.

यानंतर भारतीय हवाई संरक्षण यंत्रणेने पाकिस्तानचे हे सर्व हल्ले हाणून पाडले. दरम्यान, पाकिस्तानने आता थेट भारताची राजधानी दिल्लीवर हल्ला करण्याचा प्रयत्न केला आहे.

सरकारमधील वरिष्ठ सूत्रांनी दिलेल्या माहितीनुसार, पाकिस्तानाने दिल्लीवर 'फतेह 2' हे मिसाईल सोडलं होतं. मात्र भारताने हा हल्ला परतवून लावला. या मिसाईलला भारताने सिरसा परिसरात रोखलं. पाकिस्तानच्या फतेह-II या जमिनीवरून मारा करणाऱ्या क्षेपणास्त्राची षमता सुमारे ४०० किलोमीटर आहे.

शुक्रवार मध्यरात्री भारताने पाकिस्तानवर प्रतिहल्ला केला. पाकिस्तानी सैन्यांचे तीन एअरबेस उडवल्याची माहिती आहे. या कारवाईनंतर पाकिस्तान चवताळला असून पाकने भारताविरोधात 'बुनियान उल मर्सूस' ऑपरेशन सुरू केलं आहे.

पाकिस्तानाने दिल्लीवर सोडलेले 'फतेह 2' या मिसाईलचे तुकडे हरियाणाच्या सब्जी मंडीजवळील खाजा खेडा या शेतशिवारात सापडले. उद्ध्वस्त मिसाईलचे तुकडे पाहण्यासाठी स्थानिक आणि बघ्यांनी एकच गर्दी केली होती.

मिसाईलचे तुकडे शेतात मिळाल्याचे कळताच पोलीस घटनास्थळी दाखल झाले आहेत. पोलिसांनी मिसाईलच्या तुकड्यांची पाहणी करून ते जवळील पोलीस स्टेशनला घेऊन गेले आहेत.

पाकिस्तानने दिल्लीसह जम्मू काश्मीर, राजस्थान आणि पंजाबच्या विविध भागात हल्ला करण्याचा प्रयत्न केला आहे. या हल्ल्यानंतर संपूर्ण देशात हाय अलर्ट जारी करण्यात आला.