Weather Alert: वारं फिरलं! पश्चिम महाराष्ट्रावर पुन्हा ढग दाटणार, पुणे ते कोल्हापूर आजचं हवामान अपडेट

राज्याच्या कमाल आणि किमान तापमानात चढ-उतार सुरू आहे. पहाटे धुके, काहीसा गारवा आणि दुपारी उन्हाचा चटका, उकाडा अशी स्थिती आहे. बंगालच्या उपसागरातील 'डिटवाह' चक्रीवादळामुळे आज 29 नोव्हेंबर रोजी आकाश ढगाळ होऊन, तुरळक ठिकाणी हलक्या पावसाची शक्यता आहे. किमान तापमानात वाढ होण्याचा अंदाज हवामान विभागाने वर्तविला आहे. पश्चिम महाराष्ट्रातील जिल्हानिहाय हवामान अंदाज जाणून घेऊ.

पुणे जिल्ह्यात थंडीचा कडाका अंशत: कमी झाला असून शुक्रवारी 29.3 अंश कमाल तर 15 अंश सेल्सिअस किमान तापमानाची नोंद झाली. आज किमान तापमानात वाढ होण्याची शक्यता असून कमाल तापमान 29 अंशापर्यंत राहील.

साताऱ्यातील गारठा कमी झाला आहे. शुक्रवारी कमाल तापमान 30.7 अंशावर तर किमान 16.1 अंश सेल्सिअस नोंदवले गेले. आज जिल्ह्यात किमान आणि कमाल तापमान 17 ते 30 अंश सेल्सिअस दरम्यान राहील. तसेच जिल्ह्यात दाट धुक्याची शक्यता हवामान विभागाकडून वर्तवण्यात आली आहे.

कोल्हापूर जिल्ह्यात वातावरणातील थंडी कमी होवून कमाल तापमानाचा पारा 29.6 अंशावर राहील. तर किमान तापमानात वाढ होऊन ते 18.2 अंशांपर्यंत राहण्याचा अंदाज आहे. आज गारठा कमी राहून कमाल तापमानात अंशत वाढ होण्याची शक्यता हवामान विभागाकडून वर्तवण्यात आली आहे.

शुक्रवारी सोलापूर जिल्ह्यातील कमाल तापमान 32 अंश आणि किमान तापमान 18.4 अंश सेल्सिअस नोंदविण्यात आले. आज कमाल तापमान कायम राहील. तर किमान तापमानात वाढ होण्याची शक्यता असून ते 19 अंशांवर जाईल. त्यामुळे गारठा कमी जाणवले.

सांगली जिल्ह्यात मागील 24 तासात 17.4 अंश सेल्सिअस किमान तापमानाची नोंद झाली. आज जिल्ह्यात कमाल तापमान 30 अंशावर तर किमान 18 अंशावर राहील. जिल्ह्यात आज निरभ्र आकाश असले तरीही वाढत्या कमाल तापमानाने उकाडा जाणवेल.

पश्चिम महाराष्ट्रातील सर्वच जिल्ह्यांत कमाल तापमानाचा पारा 15 अंशावर गेल्याने थंडी कमी झाली आहे. किमान तापमानात सरासरीच्या तुलनेत 2 ते 5 अंशांची वाढ झाली आहे. अशातच पुढील 48 तासात पुन्हा ढगाळ वातावरणाची स्थिती होण्याची शक्यता हवामान विभागाकडून वर्तवण्यात आली आहे.