Weather Alert: पावसाचं धुमशान सुरूच, पुणे ते कोल्हापूर पुन्हा अलर्ट, 4 जुलैचा हवामान अंदाज

राज्यातील कोकण, घाटमाथ्यावर पावसाचा जोर पुन्हा वाढला आहे. मागील 24 तासात राज्यात 113 मंडलांत अतिवृष्टी झाली. त्यामुळे ओढे, नाल्यांच्या पाणीपातळीत पुन्हा वाढ होऊन धरणांतील पाणीपातळीत वाढ झाली आहे. अनेक धरणातून विसर्ग सोडल्याने नद्या दुथडी भरून वाहत आहेत. पुढील 24 तासातील पश्चिम महाराष्ट्रातील जिल्हानिहाय हवामान अंदाज जाणून घेऊ.

पुणे जिल्ह्यातील पावसाचा जोर कमीअधिक होत आहे. धरणक्षेत्रात पावसाचा जोर पुन्हा वाढला आहे. तर घाटमाथ्यावर दमदार पाऊस कोसळत आहे. मागील 24 तासात पुण्याच्या शिवाजीनगर परिसरात 13.5 मिलिमीटर पावसाची नोंद झाली. यावेळी कमाल तापमान 26.7 अंश सेल्सिअस राहिले. पुढील 24 तासात पावसाचा जोर ओसणार असून कमाल तापमान 29 अंश सेल्सिअस वर राहील.

कोल्हापूर जिल्ह्याच्या पश्चिम भागातही पावसाचा जोर वाढला आहे. तर पाच मंडलांत अतिवृष्टी झाली आहे. त्यामुळे धरणातील पाणीपातळी वेगाने वाढत आहे. कृष्णा, कन्हेर, राधानगरी या धरणात आवक वाढत असल्याने विसर्ग सोडण्यात आला आहे. त्यामुळे वेणा, भोगवती नद्या भरून वाहत आहेत. पुढील 24 तासात कोल्हापूर जिल्ह्यात मध्यम पावसाची शक्यता हवामान विभागाने वर्तवली आहे.

सातारा जिल्ह्यातील दोन मंडलांमध्ये मागील 24 तासात जोरदार पाऊस कोसळला. तसेच सातारा परिसरामध्ये 8.2 मिलिमीटर पावसाची नोंद झाली. पुढील 24 तासात साताऱ्यातील कमाल तापमान 28 अंश सेल्सिअस राहिल. सातारा जिल्ह्यामध्ये ढगाळ आकाशासह मध्यम पावसाची शक्यता हवामान विभागाने वर्तवली आहे.

मागील 24 तासात सांगली जिल्ह्यात 1.9 मिलिमीटर पावसाची नोंद झाली. पुढील 24 तासात सांगली जिल्ह्यात ढगाळ आकाशासह हलक्या पावसाचा अंदाज आहे. यावेळी जिल्ह्यातील कमाल तापमान 29 तर किमान तापमान 22 अंश सेल्सिअस इतके राहील.

राज्यभरात अनेक ठिकाणी अतिवृष्टी होत असताना पश्चिम महाराष्ट्रातील अवर्षणग्रस्त सोलापूर जिल्हा मात्र पावसाविना कोरडा आहे. मागील 24 तासात सोलापूर जिल्ह्यातील कमाल तापमान 31.3 अंश सेल्सिअस राहिले. पुढील 24 तासात देखील कमाल तापमानाचा पारा 31 अंशावर राहणार असून तुरळक ठिकाणी हलक्या पावसाची शक्यता आहे.

मागील 24 तासात जोरदार बरसलेल्या पावसाचा जोर पुढील 24 तासात मात्र काहीसा ओसरण्याचा अंदाज हवामान विभागाने वर्तवला आहे. मात्र 2 दिवसानंतर पुन्हा पावसाची तीव्रता वाढणार आहे. त्यामुळे नागरिकांना योग्य ती काळजी घ्यावी लागेल.