Weather Alert: थंडीच्या दिवसांत उन्हाचे चटके, बत्तीशीपार गेला पारा, पश्चिम महाराष्ट्राचं हवामान अपडेट

उत्तरेकडील थंड वाऱ्यांचे प्रवाह कमी झाल्याने राज्यात थंडी पूर्णपणे ओसरली आहे. राज्यात अंशत: ढगाळ आकाश झाले असून, उन्हाचा चटका आणि उकाडा वाढल्याचे अनुभवायला मिळत आहे. आज 26 नोव्हेंबर रोजी अंशतः ढगाळ हवामानासह तापमानातील वाढ कायम राहण्याची शक्यता हवामान विभागाने वर्तविली आहे. पश्चिम महाराष्ट्रातील जिल्हानिहाय हवामान अंदाज जाणून घेऊ.

पुणे जिल्ह्यात थंडीचा कडाका अंशत: कमी झाला असून मंगळवारी 31.6 कमाल आणि 17.2 अंश सेल्सिअस किमान तापमानाची नोंद झाली. आज कमाल तापमान 31 तर किमान 17 अंशांवर राहील. त्यामुळे गारठा कमी राहणार असून ऐन थंडीत उकाडा जाणवणार आहे.

साताऱ्यातील गारठा कमी झाला आहे. मंगळवारी साताऱ्यातील कमाल तापमानाचा पारा 31.9 राहिला. तर 19.3 अंश सेल्सिअस किमान तापमान राहिले. आज सातारा जिल्ह्यात किमान आणि कमाल तापमान 17 ते 34 अंश सेल्सिअस दरम्यान राहील.

कोल्हापूर जिल्ह्यात वातावरणातील थंडी गायब होवून कमाल तापमानाचा पारा 30 अंशावर राहील. किमान तापमानात वाढ झाली असून आज 21.4 अंशांवर राहण्याची शक्यता आहे. त्यामुळे आज गारठा कमी राहून उकाडा वाढणार आहे.

सोलापूर जिल्ह्यात मंगळवारी कमाल तापमान 33 अंश सेल्सिअसवर तर किमान तापमान 19 अंशावर राहिले. तसेच सोलापूर जिल्ह्यातील जेऊर येथे राज्यातील निचांकी 13.4 अंश तापमान नोंदले गेले. आज कमाल तापमान 33 अंशावर तर किमान 19 अंशापर्यंत राहील.

सांगली जिल्ह्यात मागील 24 तासात कमाल 33 आणि किमान 19 अंश सेल्सिअस तापमानाची नोंद झाली. आज तापमानात फारसे बदल जाणवणार नाहीत. जिल्ह्यातील ढगाळ हवामान गायब झाले असून पुढील काही दिवस कमाल तापमानाचा पारा बत्तीशीपार राहील.

पश्चिम महाराष्ट्रातील सर्वच जिल्ह्यांत कमाल तापमानाचा पारा 14 अंशांच्या वर गेल्याने थंडी गायब झाली आहे. किमान तापमानात सरासरीच्या तुलनेत 2 ते 6 अंशांची वाढ झाली आहे. दुपारच्या वेळेस उन्हाचा चटका तापदायक ठरत असून, वाढलेला उकाडा रात्री उशिरापर्यंत कायम राहत आहे.