Weather Alert: विजा कडाडणार, 2 जुलैला धो धो कोसळणार, 21 जिल्ह्यांना IMD चा अलर्ट

गेल्या दोन दिवसांपासून राज्यातील पावसाचा जोर वाढला आहे. हवामान विभागाने 48 तासांसाठी कोकण आणि घाटमाथ्यावर मुसळधार पावसाचा इशारा दिला आहे. उत्तर महाराष्ट्र, मराठवाडा आणि विदर्भातील काही जिल्ह्यांमध्ये देखील 2 जुलैला पावसाचा जोर राहणार आहे. बुधवारी 6 जिल्ह्यांना ऑरेंज तर 15 जिल्ह्यांना यलो अलर्ट देण्यात आला आहे.

मुंबई शहर आणि उपनगरामध्ये तुरळक ठिकाणी मुसळधार पावसाची शक्यता हवामान विभागाने वर्तवली आहे. कोकणातील रायगड, रत्नागिरी आणि सिंधुदुर्ग जिल्ह्याला ऑरेंज अलर्ट देण्यात आला आहे. त्याचबरोबर मुंबईसह, ठाणे आणि पालघर जिल्ह्याला यलो अलर्ट जारी केला आहे.

सह्याद्रीच्या घाट परिसरामध्ये मुसळधार पावसाची शक्यता हवामान विभागाने वर्तवली आहे. नाशिक, पुणे, सातारा आणि कोल्हापूरच्या घाट भागामध्ये एक-दोन ठिकाणी अति मुसळधार पावसाची शक्यता आहे. हवामान विभागाने सर्व घाट भागात ऑरेंज अलर्ट जारी केला आहे.

पश्चिम महाराष्ट्रात घाट भाग वगळता पावसाची तीव्रता कमी आहे. हवामान विभागाने 24 तासांसाठी कोणताही इशारा दिला नाही. तरीही सोलापूर, सांगली, सातारा, कोल्हापूर आणि पुणे जिल्ह्यामध्ये तुरळक ठिकाणी हलका ते मध्यम पाऊस होऊ शकतो. उत्तर महाराष्ट्रातील धुळे जळगाव मध्ये मुसळधार पावसाची शक्यता आहे. तर नंदुरबार, नाशिक आणि अहिल्यानगर मध्ये हलका ते मध्यम पाऊस होऊ शकतो.

मराठवाड्यातील छत्रपती संभाजीनगर आणि जालना जिल्ह्याला जोरदार पावसाचा यलो अलर्ट जारी केला आहे. परभणी, हिंगोली आणि नांदेड मध्ये एक दोन ठिकाणी जोरदार पाऊस होऊ शकतो. या काळात ताशी 30 ते 40 किमी वेगाने वारे वाहतील. तसेच सोसाट्याचा वारा आणि विजांच्या कडकडाटासह पाऊस होईल.

विदर्भातील चंद्रपूरमध्ये तुरळक ठिकाणी मुसळधार पावसाची शक्यता आहे. तर अमरावती, नागपूर, भंडारा आणि गोंदिया जिल्ह्यात हलका ते मध्यम पाऊस होण्याची शक्यता हवामान विभागाने वर्तवली आहे. अमरावती, नागपूर, गोंदिया, भंडारा आणि चंद्रपूर या जिल्ह्यांना हवामान विभागाने येलो अलर्ट जारी केला आहे.

दरम्यान, जुलैच्या सुरुवातीलाच राज्यातील विविध भागात पावसाचा जोर वाढला आहे. कोकणसह घाट भाग आणि उत्तर महाराष्ट्र, विदर्भात पुढील 2 दिवस पावसाचा जोर कायम राहणार आहे. त्यामुळे नागरिकांना योग्य ती काळजी घ्यावी लागेल.