Mumbai Pune Expressway: फिरायला जाताय? जरा थांबा! मुंबई-पुणे एक्स्प्रेसवेवर 'ब्रेक', लोणावळा घाटात वाहनांच्या रांगा

शनिवार आणि रविवारच्या सुट्टीचा आनंद घेण्यासाठी पर्यटकांनी घराबाहेर पाऊल टाकल्याने मुंबई-पुणे एक्सप्रेसवेवर आज सकाळपासूनच मोठी वाहतूक कोंडी पाहायला मिळत आहे.

विकेंडच्या गर्दीमुळे महामार्गावर वाहनांची संख्या प्रचंड वाढली असून, प्रवासाचा वेग कमालीचा मंदावला आहे.

ख्रिसमस आणि नवीन वर्षाच्या पार्श्वभूमीवर सलग सुट्ट्यांचे नियोजन करून नागरिक लोणावळा, खंडाळा आणि महाबळेश्वर यांसारख्या पर्यटन स्थळांकडे निघाले आहेत. यामुळे एक्सप्रेसवेवर वाहनांच्या लांबच लांब रांगा लागल्या आहेत.

विशेषतः बोरघाट आणि लोणावळा परिसरात वाहने संथ गतीने पुढे सरकत असून, काही ठिकाणी तर वाहनं बराच वेळ एकाच जागी उभी असल्याचे चित्र पाहायला मिळत आहे.

केवळ मुंबईहून पुण्याच्या दिशेने येणारीच नाही, तर पुण्याहून मुंबईकडे जाणारी वाहतूकही विस्कळीत झाली आहे. दोन्ही लेनवर वाहनांचा भार वाढल्याने प्रवाशांना मनस्ताप सहन करावा लागत आहे.

वाहतुकीची ही गुंतागुंत सोडवण्यासाठी महामार्ग पोलीस घटनास्थळी दाखल झाले आहेत. वाहतूक सुरळीत करण्यासाठी पोलिसांकडून सातत्याने प्रयत्न केले जात आहेत.

महत्त्वाच्या वळणांवर आणि घाटात अतिरिक्त पोलीस बंदोबस्त तैनात करण्यात आला असून, वाहनचालकांनी शिस्त पाळावी आणि संयम ठेवावा, असे आवाहन प्रशासनाकडून करण्यात आले आहे.