पहाटे नाही 'या' वेळेत वर्षातून एकदाच केली जाते खास पद्धतीने भस्म आरती, 15 फेब्रुवारीला तुम्हीही घेऊ शकता लाभ!

मध्यप्रदेशातील उज्जैन येथील विश्वप्रसिद्ध श्री महाकालेश्वर ज्योतिर्लिंगाची भस्म आरती जगभर प्रसिद्ध आहे. एरवी ही आरती दररोज पहाटे 4 वाजता ब्रह्ममुहूर्तावर होते. परंतु, संपूर्ण वर्षात केवळ महाशिवरात्रीच्या दुसऱ्या दिवशीच ही भस्म आरती पहाटेऐवजी दुपारी 12 वाजता केली जाते. या अनोख्या परंपरेमागे भगवान शिव आणि माता पार्वतीच्या विवाहाचा उत्सव आणि काही खास धार्मिक कारणे दडलेली आहेत.

शिव विवाहाचा उत्सव: उज्जैनमध्ये महाशिवरात्री ही भगवान शिव आणि माता पार्वतीचा 'विवाह उत्सव' म्हणून साजरी केली जाते. महाशिवरात्रीच्या रात्री बाबा महाकालला एका नवरदेवाप्रमाणे सजवले जाते. पहाटे 4 वाजता बाबांना सव्वा मण फुलांचा 'मुकुट' बांधला जातो. जोपर्यंत महाकाल नवरदेवाच्या रूपात असतात, तोपर्यंत त्यांच्यावर भस्म अर्पण करणे परंपरेच्या विरुद्ध मानले जाते.

अखंड दर्शनाची परंपरा: महाशिवरात्रीच्या दिवशी बाबा महाकाल सलग 44 तास आपल्या भक्तांना दर्शन देतात. या काळात मंदिराचे दरवाजे बंद होत नाहीत. सतत चालणाऱ्या जलाभिषेक आणि महापूजेमुळे पहाटेची नियमित भस्म आरती वेळेत करणे शक्य नसते.

सेहरा विसर्जन आणि पारणा: महाशिवरात्रीच्या दुसऱ्या दिवशी सकाळी बाबांचा तो फुलांचा 'सेहरा' उतरवला जातो. त्यानंतर बाबांना गरम पाण्याने स्नान घातले जाते आणि नवीन वस्त्रे अर्पण केली जातात. ही प्रक्रिया पूर्ण झाल्यानंतरच दुपारच्या भस्म आरतीची तयारी सुरू होते.

साकार ते निराकार प्रवास: असे मानले जाते की, महाशिवरात्रीला बाबा महाकाल 'साकार' रूपात भक्तांना दर्शन देतात. विवाहाचा सोहळा संपन्न झाल्यानंतर, दुसऱ्या दिवशी दुपारी होणाऱ्या भस्म आरतीद्वारे ते पुन्हा आपल्या 'निराकार' रूपात परततात.

भगवान शिवाचे विश्रांती घेण्याचे स्वरूप: पौराणिक मान्यतेनुसार, महाशिवरात्रीच्या रात्री भगवान शिव रात्रभर जागरण करतात. त्यामुळे दुसऱ्या दिवशी सकाळी त्यांना नवरदेवाचा शृंगार करून विश्रांती दिली जाते आणि दुपारी त्यांना जागे करून भस्म आरती केली जाते.

दुर्मिळ आणि विशेष 'मध्यकालीन' आरती: वर्षातून एकदा होणारी ही 'मध्यकालीन भस्म आरती' पाहण्यासाठी देशभरातून भाविक उज्जैनमध्ये गर्दी करतात. या आरतीनंतरच महाशिवरात्रीचा हा मोठा उत्सव अधिकृतपणे संपन्न झाला असे मानले जाते. टीप : (वरील माहिती सामान्य माहितीवर आधारीत आहेत. न्यूज 18 मराठी याची पुष्टी करत नाही. आपला उद्देश तुमच्यापर्यंत माहिती पोहोचवण्याचा आहे.)