भारताविरुद्धच्या T20 वर्ल्ड कप सामन्यावर पाकिस्तानचा बहिष्कार, मॅचच्या 2 पॉईंट्सचं काय होणार? मोठी अपडेट समोर

काहीच दिवसांपूर्वी पाकिस्तान क्रिकेट बोर्डाचे प्रमुख मोहसीन नक्वी यांनी पाकिस्तानचे पंतप्रधान शाहबाज शरीफ यांची भेट घेतली, तसंच टी-20 वर्ल्ड कपमध्ये खेळायचं का नाही? याबाबाबत विचारणा केली.

मोहसीन नक्वी यांनी भेट घेतल्यानंतर अखेर पाकिस्तान सरकारने भारताविरुद्धच्या सामन्यावर बहिष्कार टाकण्याचा निर्णय घेतला आहे. बांगलादेश क्रिकेट बोर्डाला पाठिंबा म्हणून पाकिस्तान सरकारने भारताविरुद्धच्या सामन्यावर बहिष्कार टाकला आहे.

बांगलादेश सरकारने भारतामध्ये टी-20 वर्ल्ड कपचे सामने खेळायला नकार दिला, तसंच आपले सामने श्रीलंकेमध्ये आयोजित केले जावेत, अशी मागणी केली. पण आयसीसीने ही मागणी फेटाळली, त्यामुळे बांगलादेश स्पर्धेतून बाहेर झाली.

बांगलादेशला पाठिंबा म्हणून आता पाकिस्ताननेही टी-20 वर्ल्ड कपमध्ये भारताविरुद्धच्या सामन्यावर बहिष्कार टाकण्याचा निर्णय घेतला आहे, पण या निर्णयाचा फटका पाकिस्तानला बसणार आहे.

भारत आणि पाकिस्तान यांच्यात 15 फेब्रुवारीला श्रीलंकेतल्या कोलंबोमध्ये आर. प्रेमदासा स्टेडियमवर सामना होणार होता. पण आता पाकिस्तानने या सामन्यावर बहिष्कार टाकल्यामुळे भारताला 2 पॉईंट्स मिळणार आहेत.

आयसीसीच्या नियमानुसार एखाद्या टीमने सामना खेळायला नकार दिला, तर त्या सामन्याचे सगळे पॉईंट्स दुसऱ्या टीमला दिले जातात. याआधी 2003 च्या वर्ल्ड कपमध्येही अशीच परिस्थिती उद्भवली होती.

2003 वर्ल्ड कपमध्ये इंग्लंडने झिम्बाब्वेमध्ये आणि न्यूझीलंडने केनियामध्ये खेळायला नकार दिला होता, त्यामुळे झिम्बाब्वे आणि केनियाला मॅचचे 2-2 पॉईंट्स देण्यात आले होते.

पाकिस्तानने भारताविरुद्धच्या सामन्यात खेळायला नकार दिल्यामुळे आता टीम इंडियाला या सामन्याचे 2 पॉईंट्स मिळणार आहेत. याशिवाय भारताचे सामने युएसए, नामिबिया आणि नेदरलँड्सविरुद्ध होणार आहेत.