Vaibhav Suryavanshi : 5,14,13... वैभव सूर्यवंशीचे 'बारा' वाजले, भारतात परत येताच ग्रह फिरले!

बिहारचा 14 वर्षांचा स्फोटक बॅटर वैभव सूर्यवंशी आतापर्यंत प्रत्येक क्रिकेट रसिकाला माहिती आहे. लहान वयातच वैभव सूर्यवंशीला जगभरात प्रसिद्धी मिळाली आहे.

आयपीएलच्या पहिल्याच हंगामात राजस्थान रॉयल्सकडून खेळताना त्याने गुजरात टायटन्सविरुद्ध अवघ्या 35 बॉलमध्ये शतक ठोकले, यामुळे वैभव सूर्यवंशी आणखी चर्चेत आला.

अलीकडील रायझिंग स्टार्स आशिया कपमध्येही सूर्यवंशीची बॅट तळपली. वैभवने युएईविरुद्ध 42 बॉलमध्ये 144 रन केल्या, यात त्याने 11 फोर आणि 15 सिक्स मारले. पण, भारताच्या स्थानिक टी-20 स्पर्धा सय्यद मुश्ताक अली ट्रॉफीमध्ये वैभव सूर्यवंशीची बॅट पूर्णपणे शांत आहे.

30 नोव्हेंबर रोजी कोलकात्यातील ईडन गार्डन्सवर बिहार आणि जम्मू आणि काश्मीर यांच्यात ग्रुप स्टेजचा सामना झाला. डावाची सुरुवात करताना वैभव सूर्यवंशी 7 बॉलमध्ये अवघ्या 5 रनवर आऊट झाला. जम्मू आणि काश्मीरचा फास्ट बॉलर आकिब नबीने त्याला बोल्ड केलं.

सूर्यवंशी या स्पर्धेत सलग तिसऱ्यांदा अपयशी ठरला आहे. याआधी चंडीगढविरुद्ध तो 14 रनवर आणि मध्य प्रदेशविरुद्ध 13 रनवर आऊट झाला होता. आयपीएल 2026 च्या लिलावाआधी राजस्थानने वैभवला रिटेन केलं आहे.

या सामन्यात जम्मू-काश्मीरने टॉस जिंकून बिहारला पहिले बॅटिंगला बोलावलं. यानंतर जम्मू-काश्मीरने 20 ओव्हरमध्ये 9 विकेट गमावून 159 रन केले. 160 रनच्या आव्हानाचा पाठलाग करताना बिहारने 20 ओव्हरमध्ये 9 विकेट गमावून 125 रन केल्या, त्यामुळे बिहारचा 34 रननी पराभव झाला. सय्यद मुश्ताक अली स्पर्धेतल्या या मोसमातला बिहारचा हा सलग तिसरा पराभव आहे.