सीएसके 5 खेळाडूंना देणार नारळ
एमएस धोनीची चेन्नई सुपर किंग्स तब्बल 5 खेळाडूंना बाहेरचा रस्ता दाखवणार असल्याचं वृत्त क्रिकबझने दिलं आहे. यात दीपक हुड्डा, विजय शंकर, राहुल त्रिपाठी, सॅम करन आणि डेवॉन कॉनवे यांचा समावेश असू शकतो. आर.अश्विनने आयपीएलमधून निवृत्ती घेतल्यामुळे सीएसकेच्या पर्समध्ये आधीच 9.75 कोटी रुपये जमा झाले आहेत.
advertisement
संजू राजस्थान सोडणार का?
दुसरीकडे संजू सॅमसन राजस्थान रॉयल्सची साथ सोडणार का? याबाबतचा सस्पेन्स अजून कायम आहे. कुमार संगकारा पुन्हा एकदा राजस्थानचा मुख्य प्रशिक्षक झाला आहे, त्यामुळे संगकारा संजूचा विचार बदलवू शकतो का? याबाबत चर्चा सुरू आहेत. वानिंदू हसरंगा आणि महीश तीक्षणा या दोन्ही स्पिनरबाबत राजस्थानकडून विचार सुरू आहे, पण हे दोघंही श्रीलंकन स्पिनर असल्यामुळे तसंच संगकाराही श्रीलंकेचा असल्यामुळे आता राजस्थान कुणाला रिलीज करणार? हे संगकारावरच अवलंबून असण्याची शक्यता आहे.
दिल्ली दिग्गजांना सोडणार
आयपीएलच्या मागच्या मोसमात दिल्लीची कामगिरीही निराशाजनक झाली, त्यामुळे दिल्ली टी नटराजन, मिचेल स्टार्क, आकाश दीप, मयंक यादव आणि डेव्हिड मिलरची साथ सोडू शकते.
अय्यरलाही बाहेरचा रस्ता
केकेआरने आयपीएलच्या मागच्या मोसमात व्यंकटेश अय्यरला 23.75 कोटी रुपयांना विकत घेतलं होतं, पण व्यंकटेश अय्यरने पूर्ण मोसमात संघर्ष केला, त्यामुळे केकेआरही व्यंकटेश अय्यरला बाहेरचा रस्ता दाखवू शकते.
आरसीबी तिघांना सोडणार
2025 ची आयपीएल जिंकणारी आरसीबीही पुढच्या मोसमासाठी 3 खेळाडूंना बाहेर करण्याचा विचार करत आहे, ज्यात लियाम लिव्हिंगस्टोन, यश दयाळ आणि सुयश शर्मा यांचा समावेश आहे. यश दयाळवर महिला अत्याचाराचे आरोप झाले आहेत, त्यामुळे तो क्रिकेटपासून लांब आहे. तर लियाम लिव्हिंगस्टोन आणि सुयश शर्मा यांचीही कामगिरी मागच्या आयपीएलमध्ये खराब झाली होती.