Sanket Gawhale : विदर्भाचा लाल पुन्हा जाणार रशियात, महिन्याभरात दुसऱ्यांदा आलं निमंत्रण

चंद्रपूरच्या संकेत गव्हाळे हा तरुण महिन्याभरातच दुसऱ्यांदा रशियाला जाणार आहे. मागच्या महिन्यात जागतिक युवा महोत्सवासाठी त्याची निवड झाली होती. यानंतर याच महिन्याच्या सुरुवातीला म्हणजे 1 ते 7 मार्च 2024 दरम्यान झालेल्या या महोत्सवासाठी तो रशियाला गेला होता. तेथून परत आल्यानंतर आता पुन्हा त्याला रशियातून आमंत्रण आले आहे. यावेळी तो 22 वा आंतरराष्ट्रीय सिनेमॅटिक पदार्पण महोत्सवात पाहुणा म्हणून सहभागी होणार आहे.

22 वा आंतरराष्ट्रीय सिनेमॅटिक पदार्पण महोत्सव हा 23 ते 26 मार्च दरम्यान, कॉन्सर्ट आणि थिएटर सेंटर युग्रा क्लासिक, खांटी मानसिस्क (Khanty-Mansiysk) याठिकाणी होणार आहे. ब्रिक्स (BRICS) देशातील प्रतिनिधी या आंतरराष्ट्रीय महोत्सवात सहभागी होणार आहेत.

या आंतरराष्ट्रीय चित्रपट महोत्सवाची 'राष्ट्रीय सिनेमॅटोग्राफीची विशेष भाषा' ही यावर्षाची थीम आहे. खांटी-मानसिस्क ऑटोनॉमस ऑक्रग - उग्रा सरकारच्या माध्यमातून 2002 पासून या महोत्सवाचे आयोजन केले जात आहे. या चर्चेत सहयोगी देशांचा चित्रपट उद्योग विकास, चित्रपट शिक्षण आणि सांस्कृतिक देवाणघेवाण यावर चर्चा होईल.

रशियन आणि आंतरराष्ट्रीय चित्रपट उद्योग जगतातील प्रतिनिधी, मीडिया व्यवस्थापक आणि सार्वजनिक व्यक्ती, कंटेंट प्रमोशन, चित्रपट प्रदर्शनाची देवाणघेवाण, चित्रपट व्यावसायिकांसाठी एक्सचेंज कार्यक्रम सुरू करणे, राष्ट्रीय चित्रपट वितरणाच्या समस्या, तसेच वारसा आणि राष्ट्रीय ओळख जतन करणे यासह ब्रिक्स चित्रपट उद्योगांच्या विकासाच्या वैशिष्ट्यांवर चर्चा करतील. या चर्चेमध्ये संकेत गव्हाळे हा तरुणही सहभागी होणार आहे. राज्यपाल नतालिया कोमारोवा यांच्यासोबत त्याची बैठक होणार आहे.

संकेत जनार्दन गव्हाळे हा तरुण चंद्रपूर जिल्ह्यातील राजुरा तालुक्यातील रामपूर गावातील रहिवासी आहे. संकेत गव्हाळे या तरुणाने भारतातील अत्यंत प्रतिष्ठित अशा, इंडियन इन्स्टिट्यूट ऑफ मास कम्युनिकेशन, अमरावती या केंद्र सरकारच्या संस्थेतून मराठी पत्रकारितेचे शिक्षण घेतले आहे. सध्या तो दिल्लीत केंद्र सरकारच्या माहिती आणि प्रसारण मंत्रालयात कार्यरत आहे.

इंडियन इन्स्टिट्यूट ऑफ मास कम्युनिकेशन आणि डायरेक्टोरेट ऑफ फिल्म्स फेस्टिव्हलच्या माध्यमातून आयोजित, आयआयएमसी फिल्म फेस्टिव्हल 22 मध्ये त्याच्या स्कूल ऑफ नेचर या डॉक्युमेंटरीला The Critics Choice Award मिळाला होता. त्याची ही डॉक्युमेंटरी रशिया येथे राज्यपाल नतालिया कोमारोवा यांनी आवर्जून पाहिली होती. आता होत असलेल्या या आंतरराष्ट्रीय महोत्सवात त्याची ही डॉक्युमेंटरी दाखवली जाणार आहे. प्रत्येक देशाची चित्रपट इंडस्ट्री वेगळी असते. त्याची सभ्यता, संस्कृती त्याच्यातून व्यक्त होत असते आणि मला ही संधी मिळाली, त्यासाठी मी आनंदी आणि उत्सुकही आहे. मला चित्रपटांची आवड असून भविष्यात मला याच क्षेत्रात काम करायचे आहे, असे त्याने न्यूज18 लोकल सोबत बोलताना सांगितले.