कोल्हापूरची शिक्षिका झाली 'ग्लोबल टिचर'; जगभरातील 3 लाख शिक्षकांतून निवड, कसं मिळालं यश? Video
- Published by:News18 Marathi
Last Updated:
कोल्हापूरच्या एका शिक्षिकेचे नाव आता एका जागतिक क्रमवारीत पाहायला मिळत आहे. नुकतीच जगभरातील लाखो शिक्षकांमधून टॉप 30 पर्सेंटाइल ग्लोबल टीचर म्हणून त्यांची निवड करण्यात आली आहे.
साईप्रसाद महेंद्रकर / प्रतिनिधी
कोल्हापूर : जागतिक स्तरावर आपले नाव ओळखले जाणे ही खूपच अभिमानाची गोष्ट आहे. त्यातच कोल्हापूरच्या एका शिक्षिकेचे नाव देखील आता एका जागतिक क्रमवारीत पाहायला मिळत आहे. डॉ. अक्षता गावडे असे या शिक्षिकेचे नाव आहे. नुकतीच जगभरातील लाखो शिक्षकांमधून टॉप 30 पर्सेंटाइल ग्लोबल टीचर म्हणून त्यांची निवड करण्यात आली आहे. तर ही परीक्षा उत्तीर्ण होणाऱ्या शिवाजी विद्यापीठ परिक्षेत्रातील त्या पहिल्या शिक्षिका ठरल्या आहेत.
advertisement
कोल्हापूरच्या डॉ. रत्नाप्पाण्णा कुंभार कौन्सिल ऑफ एज्युकेशनच्या नाईट कॉलेज ऑफ आर्ट्स अँड कॉमर्स येथील समाजशास्त्र विभागात असोसिएट प्रोफेसर म्हणून प्रा. डॉ. अक्षता गावडे कार्यरत आहेत. त्यांनी जागतिक स्तरावर घेण्यात येणारी आंतरराष्ट्रीय शिक्षक ऑलिंपियाड परीक्षा दिली होती. त्यातून जगभरातील 94 देशातील तब्बल तीन लाख शिक्षकांमधून त्यांची टॉप 30 पर्सेंटाइल शिक्षिका म्हणून निवड झाली आहे. यासाठी या परिक्षेत त्यांचे अध्यापनशास्त्र संबंधातील विविध सहा क्षेत्रांमधील सखोल ज्ञान तपासण्यात आले. यासाठीचा जवळपास 120 पानांचा रिपोर्टही देण्यात आला होता, असे अक्षता गावडे यांनी सांगितले.
advertisement
कोण आहेत अक्षता गावडे?
अक्षता गावडे यांचा जन्म कर्नाटकातील जोयडा या दुर्गम भागात झाला होता. बारावीपर्यंतचे शिक्षण गावातच आणि अर्थशास्त्र, समाजशास्त्र आणि राज्यशास्त्र या विषयात बीए पदवीचे शिक्षण धारवाड येथील कर्नाटक विद्यापीठातून पूर्ण केले. पुढे एमए समाजशास्त्र आणि अर्थशास्त्र तसेच कायद्याची पदवी त्यांनी शिवाजी विद्यापीठातून घेतली. त्यानंतर सेट आणि नेट या दोन्ही परीक्षा उत्तीर्ण झाल्या. तर 'दिव्यांगांचा सामाजिक व आर्थिक दर्जा : एक विश्लेषणात्मक अभ्यास' या विषयावर त्यांनी पीएचडी संपादन केली आहे.
advertisement
आजवरचे कार्य आणि सन्मान
डॉ. अक्षता गावडे यांनी एकूण सहा भाषांवर प्रभुत्व मिळवले असून त्या एक उत्तम वक्त्या आहेत. आजवर त्यांना शिवाजी विद्यापीठाचा बेस्ट पार्लमेंटरीयन ॲवॉर्ड, बेस्ट स्पीकर ॲवॉर्ड, संशोधन प्रबंधासाठी इन्स्टिट्यूट ऑफ स्कॉलर्स कर्नाटक यांचा यंग रिसर्चर आणि रिसर्च एक्सलन्स ॲवॉर्ड देऊन सन्मानित करण्यात आले आहे. 50 हुन अधिक राष्ट्रीय आणि आंतरराष्ट्रीय स्तरावर संशोधनपर लेखनांचे वाचन आणि प्रकाशन आजवर त्यांनी केले आहे. अनेक पुस्तकांचे अनुवाद लेखन देखील त्यांनी लिहिले आहे. अनेक सामाजिक कार्यातही अग्रेसर आहेत. या कार्याची दखल घेऊन नुकतेच त्यांना मुक्ता फाउंडेशनने आदर्श शिक्षिकेचा पुरस्कारही प्रदान केलेला आहे. तर सध्या 'दिव्यांग व्यक्तींच्या समावेशक शिक्षणासाठी आवश्यक असलेल्या अध्ययनतंत्र' या विषयावर त्यांचे संशोधन सुरू आहे.
advertisement
शिक्षक कन्येची सातासमुद्रपार भरारी, अमेरिकेत मिळालं साडेतीन कोटींचं पॅकेज
डॉ. अक्षता गावडे या कोल्हापुरातील प्रसिद्ध चार्टर्ड अकाउंटंट सीए अमितकुमार गावडे यांच्या पत्नी असून विश्वविक्रमवीर अनोज्ञा आणि संविधान कन्या, ग्लोबल पीस ॲम्बेसिडर प्रा. डॉ. अनुप्रिया गावडे या दोन लहान मुलींच्या त्या आई आहेत. दरम्यान अक्षता गावडे यांच्या यशाबद्दल सध्या त्यांचे सर्वत्र कौतुक होत आहे.
Location :
Kolhapur,Kolhapur,Maharashtra
First Published :
January 20, 2024 4:22 PM IST
मराठी बातम्या/करिअर/
कोल्हापूरची शिक्षिका झाली 'ग्लोबल टिचर'; जगभरातील 3 लाख शिक्षकांतून निवड, कसं मिळालं यश? Video
