शिक्षणासाठी वयाचं बंधन नसतं, 60 व्यावर्षी परीक्षा देत आजीने मिळवले दहावीत यश Video

या यशाबद्दल बोलताना कमलाबाई जगताप यांनी सांगितले की, आपल्या सर्वांना माहिती आहे की शिक्षण का आणि किती महत्त्वाचं आहे. नोकरी असो किंवा कुठला व्यवसाय करायचा असो यासाठी शिक्षण हे लागतंच. त्यामुळेच मी शिक्षण घ्यायला सुरुवात केली. मी पहिलीपासून ते दहावीपर्यंतच सर्व शिक्षण हे श्रीमती रमाबाई रानडे श्री हायस्कुल सेवा सदन या प्रौढ हायस्कूलमध्ये पूर्ण केलं.

घरामध्ये मुलगा सून आणि नातं आहे. नातिला सांभाळून घर काम करून मी माझा अभ्यास करत होते. जिथे घर काम करत होते त्या लोकांना माहिती न होऊ देता मी अभ्यास करायचे. कारण त्याचा परिणाम माझ्या कामावर होऊ नये असं मला वाटायचं परंतु त्यांना जेव्हा सांगितलं की मी शिक्षण ही घेत आहे तेव्हा त्या लोकांनी मला पाठिंबा दिला. मला वाचायला, लिहायला यायला पाहिजे हा माझा शिक्षणाचा मूळ उद्देश होता. मला वाटलंच नाही की मी खरच परीक्षा पास होईल. आता पास झाल्यामुळे मला खरच खुप आनंद होत आहे, असं कमलाबाई जगताप यांनी सांगितलं.

शैक्षणिक वर्ष 2023-24 यामध्ये श्रीमती रमाबाई रानडे या प्रशाळेतून 13 विद्यार्थीनी परीक्षेस बसल्या होत्या. सर्व विद्यार्थिनी या पास झाल्या आहेत. तर प्रथम आलेली मंजिरी मारणे हिला 70 टक्के गुण मिळालेले आहेत. 14 ते 60 वयाच्या पुढील विद्यार्थिनी इथे प्रवेश घेतात. त्यातीलच एक म्हणजे कमलाबाई जगताप या पहिली ते दहावी शाळेत शिकल्या आहेत. त्या घर काम करून शाळेत येत होत्या. अशा या परिस्थिती त्यांनी आपलं शिक्षण घेतलं. त्यांनी पहिल्यांदा ऍडमिशन घेतलं तेव्हा त्यांचं वय 52 होतं तर आता त्या 60 वर्षाच्या आहेत, अशी माहिती श्रीमती रमाबाई रानडे प्रौढ हायस्कुलच्या प्रभारी मुख्यधापिका निलम खोमणे यांनी दिली आहे.