कार्पोरेट कंपनीतील नोकरी सोडली अन् सुरू केला अभ्यास, नागपूरच्या संस्कारचं UPSC परीक्षेत यश, Video

युपीएससी परीक्षेत नागपुरातील संस्कार गुप्ता यांनी यश मिळवलंय. श्री रामदेव बाबा कॉलेज ऑफ इंजिनीअरिंग अँड मॅनेजमेंटमधून त्यांनी बीई कॉम्प्युटर केले आहे. 2017 मध्ये शिक्षण पूर्ण केल्यानंतर बंगळुरूमध्ये कॉर्पोरेट नोकरी सुरू केली. पण ही नोकरी सोडून यूपीएससी परीक्षेची तयारी सुरू केली. दिल्लीत एक वर्ष क्लास घेतले. त्यानंतर परत नागपुरला येऊन घरी अभ्यास केला आणि हे यश प्राप्त केल आहे. संस्कार हा साधारण घरातून येतो. त्याचे वडील हे व्यापारी असून आई गृहिणी आहे.

युपीएससी परीक्षेतील यशाबद्दल संस्कारच्या आई-वडिलांनी त्याचं कौतुक केलंय. "संस्कार हा आधीपासूनच खूप अभ्यासू आणि हुशार आहे. आम्हाला असं वाटत होतं की हा भविष्य अधिकारी होईल. कारण तो मागील पाच वर्षांपासून सतत अभ्यास करत होता. लहानपणापासूनच त्याची अभ्यासवृत्ती आम्हाला माहिती होती. त्यामुळे तो काहीतरी मोठं करेल हे अपेक्षित होतं, असं आई-वडील सांगतात.

"मेहनत करताना कधी कधी खूप वेळ वाट पाहावी लागते. यश प्राप्त होण्यासाठी तेव्हा परिवाराची खूप मदत होते. परिवाराने नेहमी सपोर्ट केलं पाहिजे. आम्ही सर्व त्याच्या सोबत उभे होतो. ज्यावेळेस अपयश येत होतं तेव्हाही त्याच्यासोबत होतो. त्यामुळेच आज आम्हाला हा दिवस पाहायला मिळाला," असे संस्कारचा भाऊ आकाश गुप्ता याने सांगितलं.