पेट्रोल पंपाजवळ नशेचा अड्डा! नेवरीत 15 नशेच्या इंजेक्शनच्या बाटल्यांसह 10 लाखांचा माल जप्त; चौघांना अटक!

रोहित हणमंत शिंदे (वय-23, रा. शाहुनगर, विटा), राजू विठ्ठल हरगुडे (वय-29, रा. विवेकानंद नगर, विटा), विशाल आनंदा चव्हाण (वय-28, रा. नेवरी नाका, विटा) आणि शुभम राजू भागवत (वय-28, रा. विटा) अशी अटक करण्यात आलेल्या संशयितांची नावे आहेत. ही कारवाई रविवार, दिनांक 27 जुलै रोजी सायंकाळच्या सुमारास करण्यात आली.

पोलिसांना मिळालेल्या माहितीनुसार, नेवरी येथील विटा-पुसेसावळी रस्त्यालगत असलेल्या एका पेट्रोल पंपाजवळील बंद पोल्ट्री शेडच्या परिसरात काही तरुण संशयास्पदरीत्या थांबले होते. पोलिसांनी त्या ठिकाणी छापा टाकला असता, संशयित रोहित आणि राजू यांच्या ताब्यातील एका मोटारीमध्ये (एमएच 29 डीएफ 0895) नशेच्या 15 सीलबंद बाटल्या आढळून आल्या. या बाटल्या ते इतर दोन संशयित, विशाल आणि शुभम यांना विकण्यासाठी आणले होते, असे तपासात उघड झाले आहे.

या कारवाईत पोलिसांनी 'मेफेंटरमिन सल्फेट' या गुंगीकारक औषधाच्या सुमारे 4 हजार 410 रुपये किमतीच्या 15 बाटल्या, 6 लाख 50 हजार आणि 2 लाख 50 हजार रुपये किमतीच्या दोन मोटारी, तसेच 57 हजार रुपयांचे 4 मोबाईल असा एकूण 10 लाखांपेक्षा जास्त किमतीचा ऐवज जप्त केला आहे.