रक्ताच्या थारोळ्यात संपला संसार! मावशीसमोर चिरला पत्नीचा गळा, दारूड्या पतीचा भयंकर कांड! वाचा सविस्तर...

या प्रकरणी मयत ममताची मावशी रेश्मा रामेश्वर राठोड (वय-२८) यांनी फिर्याद दिली आहे. पोलिसांनी दिलेल्या माहितीनुसार, ममता आणि तिचा पती प्रेम उत्तम जाधव (वय-27) हे मूळचे परभणी जिल्ह्यातील आहेत. त्यांचे 2020 साली लग्न झाले होते. मात्र, प्रेमला दारूचे प्रचंड व्यसन होते आणि तो यावरून ममताला सतत शारीरिक आणि मानसिक त्रास देत असे. पतीच्या या रोजच्या जाचाला कंटाळून ममता गेल्या सहा महिन्यांपासून लोहगाव येथे आपल्या आई आणि मावशीसोबत राहत होती. प्रेम तिला सतत फोन करून घरी परत येण्यासाठी दबाव टाकत होता, पण 'तुम्ही दारू सोडल्याशिवाय मी नांदायला येणार नाही,' अशी ठाम भूमिका ममताने घेतली होती.

रविवारी ममता आणि तिची मावशी रेश्मा यांना सुट्टी असल्याने त्या घरीच होत्या. दुपारी सव्वा तीनच्या सुमारास पती प्रेम तिला घरी नेण्याच्या बहाण्याने तेथे आला. त्याने घरात खुर्चीवर बसून ममताच्या चुलत्याला फोन लावला आणि ममताला नांदायला पाठवण्याबद्दल बोलला. बोलणे झाल्यावर त्याने तोच फोन मावशी रेश्मा यांच्याकडे दिला आणि 'तुम्ही बोला' असे सांगितले. रेश्मा फोनवर बोलण्यासाठी खोलीच्या बाहेर आल्या आणि हीच संधी साधून प्रेमने ममतावर हल्ला चढवला.

रेश्मा खोलीबाहेर असतानाच आतून लहान मुलाच्या ओरडण्याचा आवाज आला. त्यामुळे त्या घाबरून पुन्हा खोलीत गेल्या, तेव्हा समोरचे दृश्य पाहून त्यांच्या पायाखालची जमीनच सरकली. आरोपी प्रेमने एका हाताने ममताचे तोंड दाबले होते आणि दुसऱ्या हातातील चाकूने तिचा गळा चिरत होता. ममताच्या गळ्यातून रक्ताच्या चिळकांड्या उडत होत्या. रेश्मा यांनी हिंमत दाखवून प्रेमचा हात पकडला आणि त्याला मागे खेचण्याचा प्रयत्न केला, पण त्याने त्यांच्यावरही वार करून त्यांना ढकलून दिले आणि घरातून पळ काढला.