दिवसभर फक्त चॅटिंग करून कमवले 30 कोटी; कमाईची पद्धत पाहून पोलीसही चक्रावले

या तरुणांवर पाळत ठेवणाऱ्या विंग कमांडरने 23 फेब्रुवारीला आग्रा पोलीस ठाण्यात तक्रार दाखल केली होती. प्रकरणाच्या तपासासाठी आग्रा पोलीस या तरुणांपर्यंत पोहोचले. डीसीपी सूरज राय म्हणाले, '23 फेब्रुवारी रोजी सायबर पोलीस ठाण्यात फसवणुकीची तक्रार प्राप्त झाली होती, ज्यामध्ये फिर्यादीने सांगितलं की टेलिग्रामच्या माध्यमातून शेअर मार्केटमध्ये गुंतवणूक करण्याच्या बहाण्याने 1.99 कोटी रुपयांची फसवणूक केली आहे. एसीपी हरी पर्वत यांच्या नेतृत्वाखाली एक पथक तयार करण्यात आले. तपासानंतर या टोळीचा पर्दाफाश झाला आहे.

आरोपी हे ॲप देशाबाहेरील सर्व्हरवर होस्ट करायचे आणि त्याद्वारे वेगवेगळ्या सोशल मीडियावर लिंक द्यायचे. त्यानंतर त्या लिंक्सद्वारे वेगवेगळ्या खात्यांमध्ये पैसे ट्रान्सफर करायचे. मग ते पैसे म्युल अकाऊंटमध्ये सर्क्युलेट करायचे. याच म्युल अकाऊंटच्या माध्यमातून पोलिसांनी दोघांचा शोध घेतला. एक बँक कर्मचारी असून दुसरा आरोपी बँकेत खाती उघडायचा.

डीसीपी राय पुढे म्हणाले, 'आरोपी बाहेरील लोकांशी बोलून काम करून घेत असत. आतापर्यंत 6 कोटी रुपयांची 42 खाती आमच्या निदर्शनास आली आहेत, ती गोठवण्यात आली आहेत. 42 खात्यांमधून अंदाजे 25 कोटी रुपये काढण्यात आले आहेत. आरोपींकडून दोन मोबाईल जप्त करण्यात आले आहेत. दोन्ही आरोपींना अटक करण्यात आली आहे. या टोळीत आणखी काही लोक आहेत, त्यांचीही ओळख पटली आहे. त्यांना लवकरच अटक करण्यात येईल.

पोलीस या टोळीतील अन्य गुन्हेगारांचा शोध घेण्यात व्यस्त आहेत. त्याचवेळी डीसीपी सिटी सूरज राय यांनी हा खुलासा करणाऱ्या टीमला 25 हजार रुपयांचे रोख बक्षीसही दिलं आहे.