प्रियकराचा मोबाईल ढापला अन् उघड झालं मोठं कांड, समलैंगिक प्रेमाचा करुण अंत..

काळबादेवी परिसरात राहणारा मृत 55 वर्षीय व्यक्ती हा अविवाहित होता. त्याच्या मालकीची दोन्ही घरे भाड्चाने देत त्यातून मिळणाऱ्या पैशातून उदरनिर्वाह व्हायचा. याच परिसरात कपडांच्या दुकानात काम करणाऱ्या 34 वर्षीय तरुणासोबत त्याची ओळख झाली. ओळखीचे रूपांतर प्रेमात झाले. पुढे भेटीगाठी वाढत गेल्या. 12 वर्षापासून ते प्रेमसंबंधात होते. तर 34 वर्षीय तरुणाचे लग्न झाले असून त्याला मुलगा आहे.

'व्हॅलेंटाईन डे' निमित्ताने दोघांनीही काळबादेवीतील घरात सेलिब्रेशन केले. सायंकाळी 7.45 वाजण्याच्या सुमारास दोघांमध्ये समलैंगिक संबंध सुरु असताना 55 वर्षीय पार्टनर बेशुद्ध पडला. त्याला कुठलीही वैद्यकीय मदत न करता जोडीदार पसार झाला. अखेर दोन दिवसाने त्याच इमारतीत राहणाऱ्या नातेवाईकांना त्यांचा दरवाजा उघडा दिसला. आतून दुर्गंधी येण्यास सुरुवात झाली होती. त्यांनी आतमध्ये डोकावले तेव्हा 55 वर्षीय व्यक्ती मृतावस्थेत दिसली. घटनेची माहिती मिळताच एलटी मार्ग पोलिसांनी घटनास्थळी धाव घेत त्यांना रुग्णालयात दाखल केले. तेथे त्याला मृत घोषित करण्यात आले.

34 वर्षीय तरुणाने आपल्या पार्टनरला मोबाईल ठेवायला दिला होता. मात्र तो त्याच्या पार्टनरकडून गहाळ झाला. यावरून दोघांमध्ये वाद देखील झाले. पार्टनरने त्या बदल्यात पैसे देण्याचे कबूल केले होते. मात्र त्याला मोबाईल मिळाला नाही. त्यामुळे घटनेच्या दिवशी पार्टनरच्या अंगावर चादर टाकून दोन मोबाईल घेऊन गेल्याचे त्याने पोलिसांना सांगितले आहे. याच मोबाइलच्या आधारे पोलीस त्याच्यापर्यंत पोहोचले. मोबाईल चोरीने या गुन्ह्याचा उलगडा झाला आणि समलैंगिक संबंधांला वाचा फुटली.