Nagpur News: 'लुटेरी दुल्हन' समीराने 8 जणांना घातला 2 कोटींचा गंडा; मोडस ऑपरेंडी पाहून व्हाल चकित!

समीरा ही शादीडॉटकॉम (Shaadi.com) सारख्या मॅट्रिमोनिअल साइट्सचा वापर करून 'हनी ट्रॅप' रचत होती. तिने एकटीने 8 जणांची फसवणूक केली होती. दीड वर्षांपासून गिड्डीखदान पोलीस तिच्या मागावर होते, पण ती सतत पोलिसांना गुंगारा देत होती. अखेर तिला सदर पोलीस ठाण्याच्या हद्दीतील एका ठिकाणाहून अटक करण्यात आले. या घटनेची माहिती वकील फातिमा पठाण यांनी गुरुवारी पत्रकार परिषदेत दिली. न्यायालयाने समीराला तीन दिवसांची पोलीस कोठडी सुनावली आहे.

समीरा फातिमा, जी 'लुटेरी दुल्हन' या नावाने ओळखली जात होती, ती सोशल मीडियावर स्वतःला 'घटस्फोटित' (divorced) असल्याचे भासवत असे. श्रीमंत पुरुषांशी ओळख करून ती त्यांच्याशी लग्न करायची आणि नंतर त्यांची फसवणूक करायची. आतापर्यंत तिने तब्बल 8 पुरुषांशी लग्न करून कोट्यवधी रुपयांना गंडा घातला आहे.

तिच्या जाळ्यात अडकलेल्यांमध्ये अनेक प्रतिष्ठित व्यक्तींचा समावेश आहे, ज्यात भिंवडीचे हँडलूम व्यावसायिक इम्रान अन्सारी, मोमिनपुरा येथील शिक्षक नजमूज साकीब, रहेमान शेख, परभणीतील शिक्षण संस्थेचे मिर्झा अशरफ बेग, कंपनी मॅनेजर मुदस्सीर मोमिन, बँक मॅनेजर मोहम्मद तारीक अनिस, ट्रान्सपोर्ट व्यावसायिक अमानुल्लाह खान आणि रिअल इस्टेट व्यावसायिक गुलाम गौस पठाण यांचा समावेश आहे.