Cyber Crime: 'ती' फाइल आली अन् क्लिक केली; सायबर चोरट्यांचा 7 लाखांवर डल्ला, सांगलीतील दोघांना 'असं' लुटलं!

सविस्तर माहिती अशी की, या परिसरात मागील काही दिवसांपासून नागरिकांना मोबाईलवर 'पीएम किसान योजना' नावाची फाइल पाठवली जात आहे, त्याद्वारे लोकांचे मोबाईल हॅक करून त्यांच्या बँक खात्यातील पैशांवर डल्ला मारला जातोय. यासंदर्भात 3 घटना समोर आलेल्या आहेत.

झरे गावातील रोहित संजय सुतार यांच्या मोबाईलवर एक फाइल आली, त्यांनी लगेच ओपन केली. तर झटक्यात त्यांच्या बँक खात्यातून 94 हजार रुपये गायब झाले. हे पैसे काढल्याचा मेसेज त्यांच्या मोबाईलवरही आला. दुसऱ्या घटनेत विभूतीवाडीतील पोपट खर्जे (जे सध्या पुण्यात नोकरीनिमित्त असतात) त्यांच्याही मोबाईलवर अशी एक फाइल आली, त्यांनीही त्यावर क्लिक केली, तर त्यांच्या खात्यातून तब्बल 6 लाख 31 हजार गायब झाल्याची घटना घडली.

आठ दिवसांपूर्वी झरे येथे अशाचप्रकारे एका बँक खातेदाराचे 12700 रुपये गायब झाल्याची घटना घटली होती. या पैसे गायब होण्याच्या प्रकारामुळे परिसरातील नागरिकांमध्ये खळबळ उडाली आहे. संबंधित फसवणूक झालेल्या व्यक्तींनी बँकेला आणि पुणे सायबर गुन्हे अन्वेषण विभागाकडे तक्रार केलेली आहे. पोलीस तपास करत आहेत.