10 वीतील विद्यार्थिनीवर अत्याचार! जीवे मारण्याची धमकी देऊन लॉजवर नेले, साताऱ्यात खळबळ

पीडित मुलीने पोलिसांत दिलेल्या तक्रारीनुसार, आरोपी तिला खटाव तालुक्यातील एका गावात 2023 मध्ये, ती आठवी इयत्तेत शिकत असल्यापासून सतत त्रास देत होता. "तू माझ्याशी बोल, नाहीतर मी तुझ्या घरच्यांना मारून टाकीन," अशी धमकी तो सतत देत होता. 2 ऑगस्ट 2025 रोजी दुपारी आरोपीने तिला फोन करून सातारा शहरातील एका चौकात बोलावले. त्यावेळी त्याच्या चारचाकी गाडीमध्ये त्याचे दोन मित्रही होते. आरोपीने तिला गाडीत बसण्यास सांगितले आणि ती बसली.

गाडी पोवई नाका परिसरात नेण्यात आली. तेथे एका लॉजजवळ गाडी थांबवून, पार्किंगमध्ये आरोपीने तिच्यासोबत अश्लील कृत्य केले. त्यानंतर तिला लॉजमध्ये नेऊन तिच्या कुटुंबीयांना जीवे मारण्याची धमकी देऊन तिच्यावर अत्याचार केला. या प्रकारानंतर पीडित मुलीने घाबरून न जाता थेट पोलीस ठाण्यात फिर्याद दिली. पोलिसांनी तातडीने गुन्हा दाखल केला.

पीडित मुलगी अल्पवयीन आहे, हे माहित असूनही आरोपीसोबत असलेल्या त्याच्या दोन मित्रांनीही त्याला साथ दिली. ते तिघेही गाडीतून लॉजपर्यंत सोबत गेले होते. त्यामुळे पोलिसांनी या दोन्ही मित्रांवरही पोक्सो कायद्याअंतर्गत गुन्हा दाखल केला आहे. शाहूपुरी पोलीस या प्रकरणाचा अधिक तपास करत आहेत.