BFसोबत रिसॉर्टवर, 17 वर्षीय मुलीवर गोळीबार, प्रकरणाला वेगळं वळण, हॉटेल मालकासह पोलिसांवर संशय

मिळालेल्या माहितीनुसार, शुक्रवारी (३० मे) दुपारच्या सुमारास १७ वर्षीय मुलगी आपल्या प्रियकरासोबत केळवे येथील एका खासगी रिसॉर्टवर गेली होती. रुममध्ये गेल्यानंतर तिचा प्रियकर वॉशरूममध्ये गेला होता. प्रियकर वॉशरुमला गेल्यानंतर या मुलीने त्याची बॅग तपासून पाहिली. मात्र बॅगेमध्ये तिला विनापरवाना असलेला गावठी कट्टा सापडला. गावठी कट्टा तिने बाहेर काढला आणि त्याची पाहणी करत होती. नेमकं त्यावेळी या मुलीकडून चुकून ट्रिगर दाबला गेला अन् गोळी सुटली आणि ती गोळी थेट मुलीच्या मानेत घुसली. या दुर्घटनेत तरुणी गंभीर जखमी झाली.

आता या प्रकरणात पालघर पोलिसांच्या भूमिकेवर संशय व्यक्त केला जातोय. अल्पवयीन मुलींना रिसॉर्टमध्ये प्रियकरासोबत परमिशन देणाऱ्या रिसॉर्ट मालकासह आरोपी तरुण आणि गावठी कट्टा पुरवणाऱ्याला पोलिसांकडून वाचवल जात असल्याचा आरोप केला जात आहे. पोलिसांनी या तिघांनाही तपासातून वगळलं आहे. रिसॉर्ट मालक आणि पिस्तूल पुरवणाऱ्या बाळा पाटील नामक इसमाला पालघरच्या केळवे पोलिसांकडून क्लीन चीट दिली का? असा सवाल विचारला जातोय.

पीडित मुलगी ही गरीब कुटुंबातील आहे. तिच्यावर बोईसरच्या अधिकारी लाईफ लाईन्स या खासगी रुग्णालयात उपचार सुरू आहेत. मुलीवर उपचार करण्यासाठी तिच्या कुटुंबाकडे पैसे देखील नाहीयेत. अशात मुलीच्या कुटुंबीयांनी घर गहाण ठेवून पैशांची जुळवाजुळव करून उपचार सुरू आहेत. सध्या तिच्या मानेत अडकलेली गोळी काढण्यात आली आहे. मात्र तिची प्रकृती अजूनही चिंताजनक आहे. अशात पोलिसांनी रिसॉर्ट मालकासह प्रियकर आणि गावठी कट्टा पुरवणाऱ्यावर कोणतीच कारवाई केली नाही, त्यामुळे पोलिसांच्या भूमिकेवर संशय व्यक्त केला जातोय.