आजही त्याच्या हातून चुकीचं घडलं तर...! आस्ताद काळेच्या त्या VIDEO वर वडील प्रमोद यांचा संताप

मुळात कोणा इन्स्टाग्राम पेजवर हा व्हिडीओ प्रसिद्ध केला आहे. कोणाच्या परवानगीने त्यांनी हे कृत्य केलं? ते काय संपूर्ण नाटक शूट करत होते? नेमका हा भाग कसा काय कोणी शूट केला? आणि मग ती जी कोणी व्यक्ती नाटक चालू असताना मोबाईलवर स्पीकर ऑन ठेवून मोठ्याने बोलत होती, त्याचं शूटिंग का नाही केलं? कलाकार काय सार्वजनिक मालमत्ता समजता का तुम्ही? इन्स्टाग्रामवर टाकण्याआधी संबंधित व्यक्तीची परवानगी घेतली होती? असा सवाल त्यांनी हा व्हिडीओ सोशल मीडियावर पोस्ट करणाऱ्यांना विचारला.

आता ज्या महाभागांच्या अत्यंत शिवराळ आणि अनाहूत प्रतिक्रिया आल्या आहेत त्याच्याबद्दल. एक माननीय लिहितात 'हा फार माजूरडा आहे, स्वतःला काय नाना पाटेकर समजतो काय?' म्हणजे? नाना पाटेकर असं वागले असते तर चाललं असतं? आणि नशीब आस्ताद तसं काही समजत नाही! तिथे नाना असता तर त्याने त्या प्रेक्षकांच्या मुस्कटात लगावून तो मोबाईल फेकून दिला असता!

"ह्याला लई माज हाये अशी अनेकांची तक्रार आहे. याला माज नाही, स्वतःचा आणि स्वतःतल्या कलावंताचा अभिमान व कलेबद्दलची निष्ठा म्हणतात. माज असेल, तर तो त्या फोनवर बिनदिक्कत मोठ्याने बोलणाऱ्या व्यक्तीला. 500 रुपयांचं समजा तिकीट काढलं म्हणजे काय सगळं थिएटर, सगळे कलाकार विकत घेतले की काय? त्याच्या माजाबद्दल कोण बोलणार? आपण आसपासच्या आपल्याप्रमाणेच तिकीट काढून आलेल्या प्रेक्षकांचा रसभंग करत आहोत एवढीही समज नसावी? अशावेळी खरं तर इतर प्रेक्षकांनीच अशांना धडा शिकवला पाहिजे!पण आपण नको तेव्हा सहिष्णू गांधीवादी!"

"कित्येकांचं म्हणणं आहे, प्रेक्षक येतात म्हणून तुमची नाटकं चालतात, तुम्ही त्यांच्यामुळे पैसे कमावता.

"आणखी एक तक्रार म्हणजे, नाटक संपल्यावर मेकअप रूम्समध्ये फोटो काढायला आलेल्यांशी हा उद्धटपणे वागतो. बाबानो दोन अडीज तास एखादी गुंतागुंतीची भूमिका निभावून नेताना नट थकतात, भावनिक दृष्ट्याही ते दमतात. त्यांना काही वेळ तरी श्वास घेऊ द्याल की नाही? नाटक संपलं रे संपलं, की तुटून पडल्यासारखे येतात! आस्तादने कधीही, कोणालाही सोबत फोटो काढायला नकार दिल्याचं मी पाहिलेलं नाही. पण एखादे दिवशी प्रयोगानंतर तातडीने कुठे जायचं असू शकतं, काही इमर्जन्सी असू शकते हे ध्यानात घ्याल की नाही?"

"आणखी एक महत्त्वाची गोष्ट : तीनशे रुपये नाईट पासून आज पाच आकडी नाईटपर्यंत तो पोचलाय, ते त्याच्यातल्या सच्चा अभिनयाच्या जोरावरच. आस्तादला कोणी गॉड फादर, गॉड मदर नाही, आहे तो खणखणीत अभिनय, आणि आत्मविश्वास. त्याचं हे जग कोणाच्या कृपेवर चालत नाही. इथे प्रत्येक प्रयोगात स्वतःला प्रूव्ह करावं लागतं. कमी पडलात, तर फेकले जाता तुम्ही दूर. तेव्हा टीका करताना अशी अनेक भानं जागी ठेवून ती करावी"

"अस,  पण या सगळ्यात कित्येकांनी आस्तादची पाठराखणही केली आहे, त्यांना मनःपूर्वक धन्यवाद!

"मला माझ्या मुलाचा आणि त्याच्यात असलेल्या कलागुणांचा प्रचंड आणि रास्त अभिमान आहे. रास्त यासाठी, की आजही त्याच्या हातून काही चुकीचं घडलं, तर मी त्याला दोष देतोच. पण हा जो व्हिडीओ व्हायरल झालाय, त्या घटनेबद्दल माझा आस्तादला पूर्ण पाठींबा आहे", असं  म्हणत प्रमोद आस्तादच्या पाठिशी खंबीरपणे उभे राहिले आहेत.