'त्या' अपमानामुळं जिद्दीनं शिकलो गाणं, सचिन पिळगावकर यांना कोण म्हणालं बेसुरा? Video

सचिन पिळगावकरांचे आई-वडील दोघेही उत्तम गायक होते. एकदा लहानपणी सचिन पिळगावकर त्यांच्या आजोळी गेले असताना ते आईसोबत गायला बसले. सचिनचा आवाज ऐकून त्यांच्या मामांनी बेसुरा म्हणत त्यांना गाणं थांबवायला लावलं. गाण्याबाबत केलेला हा अपमान सचिनच्या इतक्या जिव्हारी लागला की त्यांनी वयाच्या 7 व्या वर्षीच गाणं शिकायचंच असा निश्चय केला आणि आज ते मोठे गायकही आहेत. "मामानं केलेल्या अपमानामुळे माझ्या आयुष्यात गाणं आलं. तसा मी खूप जिद्दी आहे. एखादी गोष्ट ठरवली की ती करतोच. तसं गाणंही मी जिद्दीनं शिकलो" असं म्हणत सचिन पिळगावकरांनी तो किस्सा सांगितला.

दरम्यान, श्री राम भक्ती शेमारू उत्सवा अंतर्गत सचिन पिळगावकर यांनी रामायणातील चौपाई गायल्या आहेत. सचिन पिळगावकरांनी गायलेल्या चौपाईंचा व्हिडीओ आणि ऑडिओ शेमारू भक्तीच्या युट्युब चॅनलवर प्रदर्शित करण्यात आला आहे. याच निमित्तानं घेतलेल्या मुलाखतीत सचिन पिळगावकरांनी हा किस्सा सांगितला.