Ramesh Pardeshi: '...म्हणून राज ठाकरेंची साथ सोडली', भाजपमध्ये जाताच पिट्या भाईचा प्रहार, राज ठाकरेंवर पलटवार

रमेश परदेशी यांनी मनसे सोडण्याचा निर्णय राज ठाकरे यांनी पुण्यात घेतलेल्या पदाधिकारी आढावा बैठकीत झाला. आगामी निवडणुकांमध्ये कामात दिरंगाई करणाऱ्या पदाधिकाऱ्यांवर राज ठाकरे संतापले होते. याचवेळी त्यांनी रमेश परदेशींना थेट विचारणा केली. राज ठाकरे म्हणाले, "तू छातीठोकपणे सांगतोस, संघाचा कार्यकर्ता आहेस, तर कशाला टाईमपास करतोस? एकाच ठिकाणी कुठे तरी राहा." एकाच वेळी दोन वेगवेगळ्या विचारधारेसोबत न राहण्याचा स्पष्ट सल्ला राज ठाकरेंनी दिल्यानंतर, बैठकीत थोडा तणाव निर्माण झाला होता.

राज ठाकरेंच्या या शब्दांमुळे रमेश परदेशी यांनी तातडीने आपला मार्ग बदलला. त्यांनी लगेचच भाजपमध्ये प्रवेश केला आणि सोशल मीडियावर संघाच्या गणवेशातील फोटो पोस्ट करत 'राष्ट्र प्रथम' ही आपली भूमिका स्पष्ट केली. भाजपमध्ये प्रवेश केल्यानंतर रमेश परदेशी यांनी आपले मत मांडले, "मी लहानपणापासून संघाचा सदस्य आहे. हा प्रश्न संस्काराचा आहे. संघ माझे संस्कार आहे आणि संस्काराने सांगितले की तू सोबत असला पाहिजेस."

परदेशी पुढे म्हणाले, "कलाकारांना न्याय देण्यासाठी आणि माझ्यावर जे संघाचे संस्कार आहेत, यामुळे मी भाजपमध्ये प्रवेश केला आहे. मराठी सिनेमाला मदत करायची असेल तर व्यापक व्यासपीठ असले पाहिजे. मी कधीच लपवले नाही मी संघाचा स्वयंसेवक आहे. राज ठाकरे कलाकारांसोबत उभेच राहतात, पण अनेकांच्या अडचणी सोडवण्यासाठी मी इथे आलो आहे." परदेशी यांच्या या निर्णयामुळे कलाकार आणि राजकारणी या दोन्ही वर्गामध्ये मोठी चर्चा सुरू झाली आहे.