'भाईजान' सलमानच्या एका भाषणावर पाकिस्तान तंतरला, थेट दहशतवादी केलं घोषित, नेमकं प्रकरण काय?

Published by:Manjiri Pokharkar

Last Updated:October 26, 2025 2:03 PM IST

Salman Khan : सलमान खानने सौदी अरेबियामध्ये केलेल्या विधानावरून संतप्त झालेल्या पाकिस्तानने त्याला दहशतवादी घोषित केले आहे.

Salman Khan : बॉलिवूड अभिनेता सलमान खान सध्या एका आंतरराष्ट्रीय वादामुळे चर्चेत आहे. त्याच्या एका विधानाने संतप्त होऊन पाकिस्तानने त्याला दहशतवादी घोषित केले आहे. शहबाज सरकारने सलमान खानला दहशतवादी घोषित करत गृहमंत्रालयाकडून नोटिफिकेशनही जारी केले आहे. पाकिस्तानी गृह विभागाने सलमान खानला फोर्थ शेड्यूलमध्ये ठेवले असून ही यादी अँटी टेररिझम कायद्याअंतर्गत येते. ज्याचं नाव या यादीत समाविष्ट केले जाते, त्याच्याविरुद्ध पाकिस्तानमध्ये कायदेशीर कारवाई केली जाऊ शकते. पाकिस्तान अशा प्रकारे कोणालाही दहशतवादी घोषित करू शकतो का आणि याविरुद्ध कुठे तरी अपील केलं जाऊ शकते का हे महत्त्वाचं आहे. भाईजानला दहशतवादी म्हणून घोषित केल्याने चाहत्यांना मोठा धक्का बसला आहे. सोशल मीडियाच्या माध्यमातून चाहते आपला संताप व्यक्त करत आहेत. सौदी अरेबियामध्ये झालेल्या 'जॉय फोरम 2025' या कार्यक्रमात सलमान खान म्हणालेला,"इथं बलुचिस्तान, अफगाणिस्तान, अगदी पाकिस्तानमधीलही लोक आहेत. सर्वजण येथे काम करत आहेत". या वक्तव्यात त्याने बलुचिस्तान आणि पाकिस्तानचा वेगळा उल्लेख केल्याने वाद निर्माण झाला.

पाकिस्तान कोणालाही दहशतवादी घोषित करू शकतो का?

पाकिस्तानच्या Anti-Terrorism Act 1997 अंतर्गत सरकारकडे हा अधिकार आहे की ते अशा व्यक्ती किंवा गटाला दहशतवादी घोषित करू शकतात, जे देशात दहशत पसरवण्याचे, हिंसा करण्याचे किंवा सरकारविरोधी शस्त्र उचलण्यासारख्या गोष्टी करण्यात सामील आहेत. पण याचा अर्थ असा आहे की पाकिस्तानमध्ये कोणालाही पुराव्यांशिवाय दहशतवादी म्हणून घोषित केले जाऊ शकते? तर याचं उत्तर नाही असं आहे. या कायद्यात ‘दहशतवाद’ याची व्याख्या अगदी स्पष्टपणे दिलेली आहे आणि हे ठरवते की कोणत्या परिस्थितीत कोणालाही दहशतवादी म्हटले जाऊ शकते.

पाकिस्तानने कायद्यात बदल केला

अहवालांनुसार, अनेकदा या कायद्यांचा वापर राजकीय किंवा वैयक्तिक शत्रुत्व व्यक्त करण्यासाठीही केला जातो. विशेषतः जेव्हा सरकार किंवा सैन्याविरोधात आवाज उठवला जातो. अलीकडेच पाकिस्तानने आपल्या दहशतवादविरोधी कायद्यात सुधारणा केली आहे. या बदलानंतर, तेथील सुरक्षा दल आणि गुप्तचर यंत्रणांना कोणत्याही संशयित व्यक्तीला वारंटशिवाय ताब्यात घेण्याची आणि चौकशी करण्याची क्षमता मिळाली आहे. यावर विरोधी पक्ष आणि मानवाधिकार संघटनांनी तीव्र विरोध केला आहे. त्यांचा असा दावा आहे की यामुळे सामान्य नागरिकांच्या स्वातंत्र्य आणि अधिकारांवर परिणाम होईल.

अपील कुठे केलं जाऊ शकतं?

कोणालाही दहशतवादी घोषित केले गेले तर तो याविरुद्ध काही करू शकतो का? याचं उत्तर होय असं आहे. पाकिस्तानच्या कायद्यात अपील आणि न्यायिक पुनरावलोकनाची तरतूद आहे. कोणतीही व्यक्ती न्यायालयाचा दरवाजा ठोठावू शकते आणि हे सिद्ध करण्याची संधी मिळवू शकते की तिला चुकीच्या पद्धतीने दहशतवादी घोषित केले गेले आहे. पाकिस्तानच्या सिंध हायकोर्ट आणि सुप्रीम कोर्ट यांनीही अनेकदा म्हटले आहे की दहशतवादाच्या प्रकरणांमध्ये कायद्याचा गैरवापर होऊ नये. एकंदरीतच या प्रकरणांमध्ये न्याय मिळवणे सोपे नसते. कायदेशीर प्रक्रिया लांब, गुंतागुंतीची असते आणि अनेकदा राजकीय दबावाचा सामना करावा लागतो.

view comments