Super Duper Trailer : दोन कुटुंबाना विकला गेला एकच फ्लॅट! निर्मिती सावंत-ललित प्रभाकर आमनेसामने, तुफान राडा

नावाप्रमाणेच हा ट्रेलरही सुपर डुपर आहे. एका घराभोवती फिरणारा गंमतीदार गोंधळ दिसत आहे. एका बाजूला परंपरा जपणारे गावाकडचे  कुटुंब, तर दुसऱ्या बाजूला आधुनिक विचारांची कास धरणारी शहरातलं तरुण जोडपं. या दोन्ही कुटुंबांना एकाच फ्लॅटची विक्री होते आणि या घराच्या ताब्यावरून वादाची ठिणगी पडते. आता एकच घर आणि राहणारे दोन टोकाचे गट… दोघांची जीवनशैली, सवयी आणि विचार अगदी वेगळे असल्यामुळे एकत्र राहतानाची त्यांची मजेशीर जुगलबंदी ट्रेलरमध्ये दिसत आहे.

( कलाकारांना शेवटचा एपिसोडही करू दिला नाही, प्रसिद्ध मराठी मालिका अचानक बंद; अभिनेत्रीची खंत )

'झाड उगायला माती आणि माणूस जगायला नाती लागतातच' निर्मिती सावंत यांच्या तोंडी असलेला भावस्पर्शी संवादही ट्रेलरमध्ये लक्ष वेधून घेतो. ट्रेलरचा शेवट तर अजिबात चुकवू नका. निर्माती सावंत यांचा भन्नाट अंदाज पाहायला मिळत आहे.  विनोद, नात्यांमधली ऊब आणि भावनिक क्षण यांचा सुंदर मेळ यात दिसून येतो.

सुपर डुपर या सिनेमात निर्मिती सावंत, शशांक शेंडे, हृषिकेश जोशी, नम्रता संभेराव, कुशल बद्रिके, प्रतीक्षा कोते यांच्यासह ललित प्रभाकर आणि विदुला चौगुले हे कलाकार प्रमुख भूमिकेत झळकणार आहेत.

या ट्रेलर लाँच प्रसंगी दिग्दर्शक समीर आशा पाटील म्हणाले, ‘ ‘सुपर डुपर’ हा केवळ विनोदी चित्रपट नाही, तर नात्यांमधल्या गंमतीजमती आणि त्यामागची भावनिक बाजू दाखवणारा प्रवास आहे. दोन पूर्णपणे वेगळ्या स्वभावाची कुटुंबं एकाच घरात राहायला लागली की, किती गंमतीशीर प्रसंग घडू शकतात, हे आम्ही हलक्या-फुलक्या पद्धतीने मांडलं आहे.

येत्या 3 एप्रिलपासून 'सुपर डुपर' हा सिनेमा प्रेक्षकांच्या भेटीला येणार आहे.  यंदाच्या उन्हाळ्याच्या सुट्ट्यांमध्ये हा सिनेमा प्रेक्षकांसाठी एक धमाल कौटुंबिक महासोहळा ठरणार आहे.