Healthy Lungs tips: हिवाळ्यात करावा लागतो श्वसनविकारांचा सामना? आहारात करा ‘या’ पदार्थांचा समावेश, वाढेल फुफ्फुसांची कार्यक्षमता

मुंबई : हिवाळ्यात बदललेलं वातावरण, थंडी आणि वाढलेल्या प्रदुषणामुळे अनेक जण आजारी पडतात. काहींना सर्दी, खोकल्यासारख्या सामान्य आजारांचा सामना करावा लागतो  तर काहींना दमा, अस्थमा सारख्या गंभीर श्वसनविकारांना सामोरं जावं लागतं. जर तुम्हाला हिवाळ्यात निरोगी राहायचं असेल तर तुमची रोगप्रतिकारक शक्ती चांगली असणं आवश्यक आहे. त्यासोबत गरजेची आहेत ती सुदृढ फुफ्फुसं. होय, फुफ्फुसं. कारण हवेतून फक्त प्राणवायू काढून तो शरीराला पुरवून शरीरातून कार्बन डायऑक्साइड बाहेर काढण्यात फुफ्फुसं महत्त्वाची भूमिका बजावतात. मोठ्या शहरांमध्ये राहणाऱ्या नागरिकांना प्रदूषणाचा सामना करावा लागतो. त्यामुळे त्यांना अनेकदा श्वास घेणं कठीण होतं. हिवाळ्यात वाढलेल्या प्रदूषणामुळे हा त्रास आणखीच वाढतो. अशा परिस्थितीत फुफ्फुसांना बळकट करून श्वसनविकारांना दूर ठेवायचं असेल तर आधी फुफ्फुसांची काळजी घेऊन त्यांना निरोगी ठेवणं क्रमप्राप्त ठरतं. जाणून घेऊयात फुफ्फुसांची काळजी घेण्याचे 5 सोपे उपाय.