तंबाखू नको, पान खा! तिसरी पिढी देतेय खास संदेश, नाशिकचं फेमस पान शॉप

नाशिक: भारतात विड्याचं पान पूर्वापार खाल्लं जातं. जेवण झाल्यानंतर तर अनेकांना पान खायला आवडतं. त्यामुळे प्रत्येक शहरात आणि अगदी गावात देखील ‘पानपट्टी’ दिसतेच. नाशिकमध्ये देखील असंच एक प्रसिद्ध पान शॉप असून इथं पान खाण्यासाठी नेहमी गर्दी असते. आजोंबांनी सुरू केलेलं हे पान शॉप आता त्यांची तिसरी पिढी चालवत असून 30 रुपयांपासून ते 300 रुपयांपर्यंत विविध पानाचे प्रकार याठिकाणी मिळतात. विशेष म्हणजे या व्यवसायातून रवींद्र लहामगे हे महिन्याकाठी लाखांवर कमाई करत आहेत.

रवींद्र यांच्या आजोबांचा नाशिकमध्ये पान विक्रीचा व्यवसाय होता. त्यानंतर त्यांचे वडील आणि स्वत: रवींद्र यांनी देखील शिक्षण घेऊन पान विक्रीचा व्यवसायच पुढे चालवण्याचा निर्णय घेतला. आता लहामगे यांचं ‘साईछत्र पान शॉप’ नाशिकमध्ये प्रसिद्ध आहे. पान खाण्यासाठी इथं अनेकजण आवर्जून येत असतात. 30 रुपयांपासून 300 रुपयांपर्यंत इथं पान उपलब्ध असून यातून महिन्याकाठी 1 लाखापर्यंत कमाई होत असल्याचं रवींद्र सांगतात. तसेच या व्यवसायातून 5 जणांना रोजगार देखील मिळाला आहे.

कलकत्ता पान, बनारस पान, विडा असे सर्व प्रकारचे पान रवींद्र यांच्या पान शॉपमध्ये मिळते. महात्मा गांधी रोडवर साई छत्र पान या नावाने नाशिमध्ये हे प्रसिद्ध ठिकाण आहे.