Tips And Tricks : घरच्या घरी 'या' सोप्या पद्धतीने चमकवा जुने सोन्याचे दागिने, नवं सोनंही यापुढे पडेल फिकं!

घरच्या घरी सोन्याचे दागिने स्वच्छ करण्यासाठी महागड्या केमिकल्सची गरज नसते. फक्त कोमट पाणी, लिक्विड डिशवॉश किंवा सौम्य साबण आणि एक मऊ ब्रश पुरेसा आहे. एका वाटीत कोमट पाणी घ्या आणि त्यात लिक्विड साबणाचे काही थेंब टाका. आता सोन्याचे दागिने 10 ते 15 मिनिटे या पाण्यात भिजत ठेवा. त्यामुळे मळ सैल होतो. त्यानंतर सॉफ्ट टूथब्रश किंवा मेकअप ब्रशने हलक्या हाताने दागिने स्वच्छ करा, विशेषतः जिथे डिझाइन किंवा जोड आहेत तिथे. जास्त जोर लावू नका, याची काळजी घ्या.

धुतल्यानंतर दागिने स्वच्छ पाण्याने नीट धुवा, जेणेकरून साबणाचा अंश राहणार नाही. त्यानंतर कोरड्या आणि मऊ सुती कापडाने हलक्या हाताने पुसा. दागिने पूर्णपणे वाळू द्या आणि मगच डब्यात ठेवा. ओलसर दागिने ठेवल्यास पुन्हा मळ साचू शकतो.

अनेकदा लोक टूथपेस्ट, बेकिंग सोडा किंवा केमिकल क्लिनरने सोने स्वच्छ करतात, जे हानिकारक ठरू शकते. यामुळे दागिन्यांची पॉलिश खराब होऊ शकते आणि नाजूक डिझाइन झिजू शकतात. तसेच दगड बसवलेल्या दागिन्यांवर या गोष्टी अजिबात वापरू नयेत.

तुम्ही दागिने रोज घालत असाल, तर महिन्यातून एकदा हलकी स्वच्छता पुरेशी आहे. जड दागिने वर्षातून 2-3 वेळा स्वच्छ केले तरी चालतात. खूप वेळा स्वच्छता करणे टाळा.

सोन्याचे दागिने नेहमी वेगवेगळ्या कापडात किंवा सॉफ्ट बॉक्समध्ये ठेवा. परफ्यूम, हेअरस्प्रे आणि लोशन लावल्यानंतरच दागिने घाला. झोपताना किंवा आंघोळ करताना दागिने काढणे अधिक चांगले ठरते.