शाहीहार ते चिंचपेटी, मकर संक्रांतीसाठी हलव्याचे दागिने, 70 रुपयांपासून करा खरेदी

कोल्हापूर : नवीन वर्ष सुरु झालं की पहिला सण म्हणजे मकर संक्रांत. तिळाचे लाडू आणि तिळगुळ वाटून ‘तिळगूळ घ्या गोड- गोड बोला’ असे सांगत वर्षाची सुरुवात आपण गोड करत असतो. तिळाच्या लाडूसोबतच या सणाची खासियत म्हणजे ‘हलव्याचे दागिने’. या दिवशी हलव्याचे सुंदर दागिने घालण्याची पद्धत आहे. दागिने घालण्याची ही पद्धत पारंपरिक आहे. कोल्हापुरातील बाजारपेठेत या दागिन्यांच्या भरपूर व्हरायटी उपलब्ध आहेत. महालक्ष्मी देवीच्या परिसरात महाद्वार रोड वर हे दागिने तुम्हाला खरेदी करता येतील.

गेल्या 50 वर्षांपासून कोल्हापूरच्या सुगंधी परिवाराने हे हलव्याचे दागिने बनवण्याची परंपरा कायम ठेवली आहे. त्यांच्या परिवाराची तिसरी पिढी आज हलव्याचे दागिने मोठ्या उत्साहात बनवत आहेत. सुगंधी परिवाराच्या अलका सुगंधी यांना खरंतर लहानपणापासून वेगवेगळ्या गोष्टी स्वतः बनवण्याची आवड होती. आज त्यांच्याच माध्यमातून त्यांच्या आवडीचं रूपांतर एका मोठ्या व्यवसायात झालं आहे. त्यांनी बनवलेल्या हलव्याच्या दागिन्यांची मागणी ही देश विदेशात असल्याची पाहायला मिळते. खरंतर सध्या बाजारामध्ये हलव्याचे दागिने वेगवेगळ्या व्हरायटीमध्ये उपलब्ध आहेत. पण बहुतांशी फेविकॉलचा वापर करून हे दागिने बनवले जातात मात्र सुगंधी परिवार आजही पारंपरिक पद्धतीने फुलाप्रमाणे तिळगुळ ओऊन दागिने बनवतात.