शेवटी आईच ती.., पोटच्या पोरासाठी किडनी देणार, पण उपचाराचा खर्च कसा करणार? Video

कोल्हापुरच्या पन्हाळा तालक्यातील दिगवडे गावची ही घटना आहे. शरद शिंदे हा तरुण आपल्या आई-वडिल यांच्याबरोबर राहत सुखी संसार करत होता. गावातील आपल्या छोट्या सलूनच्या कमाईवरच तो आपल्या बायको आणि मुलांसह घरची जबाबदारी उचलत होता. मात्र काळाच्या मनात काही वेगळेच होते. काही दिवसांपूर्वी त्याला मूत्रविकाराचा त्रास जाणवू लागला. पुढे त्याच्या दोन्ही किडन्या निकामी झाल्याचे निदान झाले अन् आख्खे कुटुंबच कोलमडून गेले.

शरदला वाचवण्यासाठी एका किडनी प्रत्यारोपणाची गरज होती. मग यावेळी त्याची आई मंगल शिंदे या पुढे सरसावल्या. लेकाला वाचवण्यासाठी मी माझी किडनी द्यायला तयार आहे, असे त्या मातेने ठामपणे सांगितले. तपासणीत आईची किडनी शरदसाठी मॅचही झाली. मात्र पुढे सर्वात समस्या होती ती म्हणजे शरदच्या सर्व उपचारासाठी होणारा खर्च. हातावरचे पोट असणारे शिंदे कुटुंब शरदच्या कमाईवरच गुजराण करत होते. मात्र आता तोच अंथरुणाला खिळल्यामुळे सर्वांपुढे काय करावे हाच प्रश्न उभा राहिला होता.

या सगळ्या परिस्थितीतून मार्ग काढण्यासाठी शिंदे कुटुंबाने मदतीची आर्त हाक कोल्हापूरकरांना दिली आहे. शरद याच्यावर होणारी किडनी प्रत्यारोपण शस्त्रक्रिया आणि उपचार यासाठी होणारा खर्च हा लाखांच्या घरात आहे. शस्त्रक्रियेपूर्वी देखील शरदवर सध्या उपचार सुरू आहेत. त्यामुळेच समाजातल्या दानशूर व्यक्तींनी या मायलेकाची मदत करण्याची आवश्यकता आहे. आत्तापर्यंत कित्येकांनी सामाजिक भान जपत आपल्या परीने मदत पुरवली आहे. आजवर सव्वा चार लाखांच्या वर रक्कम मदत स्वरुपात जमा झाली आहे. मात्र मिळत असणारी मदत अपुरी असून अजूनही मदतीची गरज शरद आणि मंगल शिंदे यांना आहे.

शरदच्या शस्त्रक्रिया आणि उपचारासाठी मदत म्हणून देऊ इच्छिणाऱ्यांना त्यांची रक्कम ही बँक ऑफ इंडियाच्या कोतोली ब्रँचच्या 094810110000240 या बँक अकाऊंट नंबरवर पाठवता येईल.