Health Tips : डिप्रेशनच्या गोळ्या घेताय? आरोग्यासाठी ठरू शकते धोकादायक, आधी हे वाचा

डिप्रेशनच्या औषधांचा वापर फक्त वैद्यकीय देखरेखीखाली करणे गरजेचे आहे. स्वयंपूर्णपणे औषधे घेणे किंवा डोसमध्ये बदल करणे अत्यंत धोकादायक ठरू शकते. मानसिक आजार हे लज्जास्पद नसून उपचारक्षम आहेत, हे समाजाने समजून घेणे आवश्यक आहे. औषधांबरोबरच काउन्सेलिंग, योग, ध्यान, नियमित झोप, व्यायाम आणि समतोल आहार या गोष्टींचाही उपचारात मोठा फायदा होतो.

डॉ. अविनाश भोंडवे यांनी सांगितले की, या औषधांच्या दीर्घकालीन वापरामुळे काही दुष्परिणामही दिसून येतात. काही रुग्णांना झोप न लागणे, वजन वाढणे, पचन बिघडणे, लैंगिक इच्छेत घट, चिडचिड, हात थरथरणे किंवा भावनिक संवेदनांचा अभाव जाणवतो. औषधे अचानक बंद केल्यास विथड्रॉवल सिंड्रोम म्हणून ओळखला जाणारा ताण, चिंता, थकवा आणि नैराश्याचा पुन्हा उद्रेक होऊ शकतो. काही प्रकरणांमध्ये शरीराच्या अवयवांवरही दीर्घकाळ परिणाम दिसून येतात, विशेषतः यकृत आणि मूत्रपिंडावर मोठे दुष्परिणाम होतात.

डॉक्टरांना माहिती द्या: तुम्हाला जाणवणारे दुष्परिणाम डॉक्टरांना त्वरित सांगावे, जेणेकरून ते औषध बदलू शकतील.

उपचारांशी जोडून रहा: उपचारांच्या प्रक्रियेत संयम ठेवावा लागतो आणि डॉक्टरांनी दिलेल्या सल्ल्याचे पालन करावे.

पूर्ण उपचार घ्या: काहीवेळा लक्षणे सुधारण्यासाठी जास्त वेळ लागू शकतो, पण डॉक्टरांच्या सल्ल्याशिवाय औषधे घेणे बंद करू नका.